DILI, 20 dezembru 2022 (TATOLI)—Sentru Internamentu Viqueque hahú rejista fali moras dengue ida durante fulan-dezembru nia laran.
“Daudaun ne’e pasiente halo hela tratamentu. Pesoál saúde sira agora halo hela promosaun ba komunidade tanba tempu udan ne’e susuk komesa moris barak hodi fó impaktu ba labarik sira,” Xefe Sentru Internamentu Viqueque, Celestina Soares, hateten ba Agência Tatoli, via telefónika, tersa ne’e.
Inisiativa halo promosaun ba prevensaun dengue iha munisípiu Viqueque atu komunidade bele halo prevensaun ba dengue tanba tempu rai udan ne’e susuk moris iha bee nalihun sira.
“Nune’e komunidade tenke hamoos bee nalihun no lata a’at sira tenke hakoi tiha atu susuk labele moris,” nia akresenta.
Notísia relevante: Sentru Saúde Viqueque rejista dengue 31 iha abril
Ho nune’e, nia husu ba abitante Viqueque sira hodi halo limpeza iha ida-idak ninia uma atu susuk labele moris no kalan toba karik labarik sira tenke uza muskiteiru atu prevene moras dengue.
Sentru Internamentu Viqueque rejista moras dengue 75 iha janeiru to’o marsu tinan ne’e, hafoin númeru kazu ne’e redús.
Aleinde ne’e, rejista dengue 31 kompostu hosi feto 14 no mane 17, ne’ebé hosi númeru ne’e maioria hanesan labarik ho tinan lima mai kraik maibé konsege rekupera hotu.
Jornalista : Vitorino Lopes da Costa
Editora : Julia Chatarina
