DILI, 21 dezembru 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu rezolusaun Governu rua, ne’ebé aprezenta hosi Ministru Koordenadór Asuntu Ekonómiku, Joaquim Amaral.
Projetu rezolusaun Governu ba nomeasaun Pedro Godinho Marçal da Costa ba kargu nu’udár Prezidente Autoridade Nasionál Dezignada atu Kombate Alterasaun Klimátika, Institutu Públiku no António Lelo-Taci ba kargu Prezidente Autoridade Nasionál Lisensiamentu Ambientál, Instututu Públiku.
“Indivíduu na’in-rua durante ne’e hala’o hela knaar no esperiénsia profisionál no akadémika iha área ida-ne’e, sira la’ós ema foun ba instituisaun hira ne’ebé maka sira lidera,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu.
Notísia relevante: Alterasaun Klimátika fó Impaktu bá Saúde Umana
Kriasaun autoridade rua ne’e aprova ona iha sorumutuk KM iha loron 27 abril 2022.
Nia esplika, António Lelo-Taci, daudaun hanesan Prezidente Autoridade Nasionál internu ho lisensiamentu Ambientál no Pedro Marçal nu’udar Asesór iha Autoridade Nasionál Dezignada atu Kombate Alterasaun Klimátika.
“Entidade rua ne’e foun, harii seidauk kleur hosi Konsellu Ministru,” nia tenik.
Jornalista : Antónia Gusmão
Editora : Julia Chatarina
