MSSI rekruta pesoál rejistu “bolsa da mãe jerasaun foun” faze daruak
DILI, 21 dezembru 2022 (TATOLI)—Diretór Jerál Finansa Ministériu Solidariedade Sosiál no Inkkuzaun (MSSI), Rui Manuel Gago Exposto, informa MSSI rekruta ona pesoál rejistu ba implementasaun programa bolsa da mãe jerasaun foun faze daruak.
Notísia Relevante: MSSI submete ona lista benefisiáriu “bolsa da mãe jerasaun foun” ba BNCTL
Programa bolsa da mãe jerasaun foun faze daruak ne’e, tuir planu, sei implementa iha munisípiu Liquiça, Covalima, Manatuto no Viqueque.
“Ita agora iha hela prosesu rekrutamentu ba pesoál rejistu bolsa da mãe jerasaun foun nian ba munisípiu Liquiça, Covalima, Manatuto no Viqueque ne’e halo ona rekrutamentu no hein atu entrevista. Loloos ne’e, ita entrevista ona iha fulan dezembru ne’e maibé ita iha fali programa subsídiu fim do ano $200 ba uma kain, entaun ita adia fali ba fulan oin, depois finaliza tiha subsídiu $200,” Rui Manuel Gago Exposto hateten ba Agência Tatoli, iha nia kna’ar fatin, kuarta ne’e.
Pesoál rejistu ba programa bolsa da mãe jerasaun foun ne’ebé Ministériu Solidariedade Sosiál no Inkluzaun (MSSI) rekruta ba programa regresu 100-resin.
Governu aloka osan ba munisípiu haat inklui ho munisípiu tolu Ainaro, Bobonaro no Rejiaun Administrativa Espesiál Oé-Cusse Ambeno (RAEOA) hamutuk millaun $13,7.
Programa ida-ne’e implementa bazea ba dekretu lei 22/2021, 10 novembru ne’e, katak iha tinan 2022 ita sei implementa programa bolsa da mãe jersaun foun ba iha Ainaro, Bobonaro ho RAEOA depois iha tinan 2023 ne’e sei habelar no haluan tan ba munisípiu haat mak hanesan Liquiça, Covalima, Manatuto no Viqueque.
Notísia Relevante: MSSI rekomenda DNSRN fasilita BI ba benefisiáriu “bolsa da mãe jerasaun foun”
Jornalista : Osória Marques
Editór : Cancio Ximenes
