DILI, 21 dezembru 2022 (TATOLI)—Deputadu hosi bankada Frente Revoluzionária Timor-Leste Independente (FRETILIN) iha Parlamentu Nasionál (PN), Dário Madeira, husu ba Governu liuhosi Ministériu Obra Públika (MOP) atu loke dalan alternativa, relasiona ho ponte Buanurak no Dilór iha Viqueque kotu.
“Ha’u reprezenta povu Viqueque, dala barak ha’u sempre ko’alia beibeik iha uma fukun kona-ba ponte Dilór no Buanurak ne’ebé kotu, ida-ne’e la’ós ha’u mesak maka hato’o maibé deputadu sira hosi Manatuto mós hato’o preokupasaun sira-ne’e. Ministériu mós hatene hela ponte kotu, maibé hein ba hein, nein iha solusaun ruma ba problema to’o agora Ministru Obra Públika troka malu, espera Ministru foun tanba uluk nia mós deputadu, bele hatene rasik realidade sira-ne’e,” Deputadu bankada Governu hateten ba Agência Tatoli, iha resintu PN, kuarta ne’e.
Ponte Dilór lokaliza iha postu Lacluta, hanesan ligasaun postu administrativu Natarbora, munisípiu Manatuto bá postu administrativu Lacluta, munisípiu Viqueque no ponte Buanurak baliza entre postu Ossu no postu Viqueque Vila.
Notísia relevante: MOP Viqueque komunika ona parte nasionál rezolve ponte Baunurak kotu
Nia dehan, parte relevante fó resposta katak sei iha prosesu dezeñu nia laran.
“Ha’u nafatin eziji ba Governu hodi aselera ponte Dilór, nune’e mós ponte Buanurak kotu iha loron 28 novembru foin lalais ne’e. Ha’u hato’o kedas iha plenária hodi halo atendimentu emerjénsia, maibé agora ba tan semana tolu seidauk iha resposta ruma. Ha’u horiseik iha plenária kontinua relata hodi Ministru Asuntu Parlamentár no Komunikasaun hato’o iha Konsellu Ministru hodi hato’o ba MOP,” nia akresenta.
Deputadu ne’e nota, bainhira ponte rua ne’e kotu, fó impaktu tebes ba komunidade hosi postu haat hanesan Lacluta, Viqueque Vila, Uatulari no Uatucarbau.
“Sira labele liu iha tempu udan no sai izoladu tanba karreta labele liu. Agora tempu udan ne’e komunidade labele liu, sira iha de’it Viqueque tanba mota tun,” nia tenik.
Aleinde ne’e, bainhira pasiente sira ba halo tratamentu iha Ospitál Referál mós labele liu.
“Ha’u rekomenda ba Governu atu loke estrada alternativa hosi postu saúde Buanurak nian ba mosu iha Ensinu Sekundáriu 04 setembru Viqueque, kuaze kilómentru 3 resin. Ida-ne’e tempu udan mós ita bele fasilita ona komunidade tanba la hakur mota Governu no Institutu Jestaun Ekipamentu, Institutu Públiku (IGE, I.P), tenke kria dalan alternativa ne’e, bainhira ita la loke dalan alternativa maka ita kastigu de’it povu,” Deputadu ne’e dehan.
Jornalista : Vitorino Lopes da Costa
Editora : Julia Chatarina
