BNCTL hahú hala’o pagamentu ba Idozu no bolsa da mãe iha Viqueque
DILI, 22 dezembru 2022 (TATOLI)— Banku Nasionál Komérsiu Timor-Leste (BNCTL), hahú hala’o pagamentu subsídiu ba Idozu no Bolsa da Mãe iha munisípiu Viqueque.
Xefe suku Caraubalo, postu Viqueque vila, munisípiu Viqueque, João Pinto, informa iha loron segunda (19/12), BNCTL hahú halo pagamentu ba idozu no bolsa da mãe, maibé billeti identidade (BI) mak sai difikuldade ba benifísiáriu sira hosi Caraubalo.
“BNCTL hahú halo pagamentu, maibé banku husu benifísiáriu sira ne’ebé simu diretu tenke lori ho dokumentu BI, maibé idozu no bolsa da mãe sira barak mak seidauk iha BI. Nune’e iha pagamentu ida-ne’e BI sai difikulta ba nia benifísiáriu sira iha suku Caraubalo”, Xefe suku Caraubalo, hateten ba Agência TATOLI, telefónika, kuarta ne’e.
Maibé, nia dehan iha pagamentu ida-ne’e BNCTL tolera mak idozu, maibé benefisiáriu invalidéz sira no bolsa da mãe ne’e banku la tolara, nune’e tenke lori nia BI maka foin hetan direitu subsídiu ne’e.
Tuir nia daudaun Notariadu munisípiu Viqueque labele produs BI foun tanba blanku laiha no mákina printer aat, nune’e difikulta benefisiáriu sira atu asesu dokumentu.
Nune’e, nia husu ba Ministériu Justisa (MJ) atu haruka blanku BI no hadia lalais mákina imprime iha Viqueque, atu fasilita trata dokumenu ba benifísiariu sira-ne’e.
Iha suku Carabalo BNCTL hala’o pagamentu durante loron tolu hahú segunda no kuarta ho totál benifísiáriu suku Caraubalo hamutuk na’in-434 no ivalidu no bolsa da mae totál hamutuk na’in-209.
Responde kestaun ne’e, Ministru Justisa (MJ) Tiago Sarmento Amaral, haktuir kona-ba preokupasaun trata BI MJ sei responde iha tinan 2023.
“Mákina imprime BI ne’e iha territóriu ne’e kuaze avaria hotu ne’ebé tinan oin ami bele responde hotu ona,” nia afirma.
Tuir dadus lista hosi BNCTL munisípiu Viqueque hatudu benefisiáriu idozu na’in-11.288 no ivalidéz no bolsa da mãe na’in-2.837.
ho kada postu adiministrativu lima hanesan postu Viqueque vila idozu na’in-2.350 no ivalidu no bolsa da mae totál na’in-752, pagamentu hahú fulan dezembru sei ramata iha janeiru 2023.
Hosi postu Ossu idozu na’in-2.350 no ivalidéz no bolsa da mãe na’in-724, pagamentu hahú janeiru sei ramata iha fevereiru 2023.
Postu Lacluta idozu na’in-1.104 no ivalidéz no bolsa da mãe totál na’in-504. Pagamentu hahú fulan fevereiru sei ramata iha loron 17 fulan fevereiru 2023.
Postu Uatulari idozu na’in-2.727 no ivalidu idozu no bolsa da mãe totál na’in-516. Pagamentu hahú fulan fevereiru sei ramata iha marsu 2023.
Enkuantu, Postu Uatucarbau na’in-2.560 no ivalidu idozu no bolsa da mae totál hamutuk na’in-337. Pagamentu hahú fulan marsu sei ramata iha loron 17 marsu 2023.
Jornalista : Vitorino Lopes da Costa
Editóra : Florencio Miranda Ximenes
