Top

MAE husu autoridade lokál atu tau konsiderasaun ba reklamasaun

Ministru Administrasaun Estatál, Miguel Pereira de Carvalho. Imajen TATOLI/Francisco Sony

DILI, 22 dezembru 2022 (TATOLI)—Ministru Administrasaun Estatál (MAE), Miguel Pereira de Carvalho, husu autoridade lokál atu tau konsiderasaun ba lista reklamante nune’e tenke simu reklamasaun hosi benefisiároi subsídiu fim do ano $200 ba uma kain ne’ebé seidauk simu ninia diretu.

Ba kestaun ida-ne’e, nia hateten, iha regra ne’ebé estabelese bainhira naran laiha lista entaun benefisiáriu ne’e bele hato’o reklamasaun liuhosi xefe suku no xefe aldeia, depois sei trata dadus sira-ne’e.

“Agora da-ruak nia ita bele haree katak xefe família sira númeru aumenta tan hosi tinan 2020 to’o 2022, entaun ita husu xefe suku no xefe aldeia atu simu lista reklamasaun nune’e sira bele simu sira-nia direitu,” Governante ne’e hateten ba Agência Tatoli, iha resintu Palásiu Governu, kuarta ne’e.

Ho nune’e, Ministériu Administrasaun Estatál liuhosi xefe suku no xefe aldeia sira tenta másima bele akomoda família sira-ne’ebé forma família foun entre tinan 2020 to’o 2022.

Husu kona-ba lista reklamasaun ne’ebé akontese iha subsídiu programa pandemia COVID-19 maibé ba tinan ne’e sei iha lista reklamasaun ne’ebé ho naran xefe família hanesan, nia hatán, ida-ne’e presiza iha prova.

“Ha’u presiza prova para bele haree kona-ba reklamasaun hosi família vulnerável sira iha munisípiu hotu ne’ebé seidauk hetan ninia direitu,” nia esplika.

Antes ne’e Governu liuhosi reuniaun Konsellu Ministru, halo ona alterasaun dahuluk ba dekretu-lei númeru 37/2022, 25 maiu, kona-ba subsídiu fim do ano $200 ba uma kain ho valór $200 hodi klarifika ba aplikasaun, ne’ebé antes ne’e uma kain hotu iha territóriu tomak sei sai benefisiáriu maibé ho alterasaun dekretu-lei ne’e, mak atribuisaun ba de’it uma kain ne’ebé nia membru nia saláriu mensál la liu $500.

Tuir dadus, uma kain iha territóriu nasionál ho totál hamutuk 39.000 ne’ebé submeter ona ba Ministériu Solidariedade Sosiál no Inkluzaub (MSSI) ho totál pagamentu millaun $7,8.

Notísia Relevante: Ekipa pagamentu selu ona subsídiu $200 ba uma kain 208.619

Jornalista : Osória Marques

Editór        : Cancio Ximenes

Publisidade

Leave a Reply

Latest Post

error: Content is protected !!