DILI, 22 dezembru 2022 (TATOLI)—Polísia Nasionál Timor-Leste (PNTL) munisípiu Viqueque prepara ona planu asegura loron boot.
“Ha’u prepara ona planu operasaun hodi asegura selebrasaun loron boot natál no simu tinan foun iha loron 31 dezembru kalan,” Komandante PNTL Viqueque, Superentendente Polísia, Sebastião Alves Quintão, hateten ba Agência Tatoli, via telefónika, kinta ne’e.
Aleinde ne’e, Komandante fó mós alerta ba Komandante Eskuadra postu lima hanensan Lacluta, Ossu, Uatucarbau, Viqueque Vila no Uatulari hodi halo operasaun.
“Ami prontu asegura 24 horas, mantein seguransa no halo monitoriza iha munisípiu Viqueque. Daudaun ne’e ami preparadu no ha’u halo ona enkontru ida ho ha’u-nia Komandante Eskuadra na’in-lima hodi prepara kondisaun atu alerta tan ba membru Eskuadra sira,” nia akresenta.
Notísia relevante: PNTL Viqueque garante seguransa iha komemorasaun restaurasaun independénsia ba da-XX
Nune’e, nia fó hanoin ba Komadante Eskuadra sira hodi halo avizu ba komunidade hodi kria estabilidade.
“Ami la autoriza komunidade sunu fugete iha tempu bailet, bele sunu iha loron 31 kalan simu tinan foun,” nia tenik.
Daudaun membru PNTL ne’ebé serbisu efetivu iha munisípiu Viqueque hamutuk na’in-140.
Jornalista : Vitorino Lopes da Costa
Editora : Julia Chatarina
