iklan

EKONOMIA, HEADLINE

Governu planeia legaliza jogu tradisionál ‘futu-manu’ iha tinan 2023

Governu planeia legaliza jogu tradisionál ‘futu-manu’ iha tinan 2023

Inspetór Jerál Jogu, Domingos da Costa Guterres. Imajen/Tatoli

DILI, 23 dezembru 2022 (TATOLI)–Ministériu Turizmu Komérsiu no Indústria (MTKI) liuhosi Inspesaun Jerál Jogu, planeia tinan oin (2023) sei legaliza jogu tradisionál futu-manu.

“Ba-oin ami hakarak legaliza tan jogu futu-manu hodi nune’e bele hatama reseita ba kofre Estadu. Atividade ne’e la’o hela no loron-loron ema joga maibé seidauk legaliza,” Inspetór Jerál Jogu, Domingos da Costa Guterres, informa ba Agência Tatoli, iha ninia knaar fatin, sesta ne’e.

Nia konsidera, vantajen hosi jogu tradisionál ne’e barak maibé importante liu mak hatama reseita ba kofre Estadu.

“Nia vantajen aleinde rekolla tasa, parte ida mós ita bele iha vantajen seluk. Bainhira ita prepara fatin di’ak hanesan sentru ida, bele atrai turista bele vizita, vantajen seluk maka kuandu jogu ne’e iha, ita-nia inan-aman sira balun halo ninia negósiu kiik sira iha sorin-sorin, entaun fó benefísiu ba família ne’ebé halo negósiu kiik,” nia akresenta.

Notísia relevante: MTKI sei estabelese sentru jogu tradisionál iha Kuluhun 

Tuir inspetór, bainhira legaliza jogu ne’e, Governu fasil atu kontrola, hanesan manu ne’ebé lori futu labele kontamina ho aimoruk no labarik kiik labele asesu ba fatin sira ne’e.

“Maibé ninia dezvantajen mós iha, hanesan dala-ruma Governu loke jogu barak liu bele fó impaktu ba sosiedade ninia karater, maibé di’ak liu Governu legaliza hodi deside sentru ida nune’e fasil kontrola,” nia tenik.

Maski nune’e, ekipa sei tun ba terrenu hodi halo levantamentu ba fatin sira, nune’e deside fatin ida sai sentru ba jogu tradisionál futu-manu.

“Daudaun operadór sira ne’ebé mak hala’o ona jogu tradisionál hanesan futu-manu iha Dili-laran iha fatin hira kedan. Ami sei konvida sira hodi enkontru atubele haree fatin di’ak mak bele legaliza, ida laduun di’ak ka perturba orden públiku ami sei hateten sira muda ka hamutuk tiha iha fatin ida de’it. Ba ida-ne’e ami-nia ekipa sei tun ba halo levantamentu,” nia adianta.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!