DILI, 23 dezembru 2022 (TATOLI)—Governu liuhosi Ministériu Turizmu Komérsiu no Indústria (MTKI), iha kinta (22/12), inaugura sítiu turístiku Rabilau iha postu administrativu Maubisse, munuisípiu Ainaro.
Ministru Turizmu Komérsiu no Indústria, José Lucas do Carmo da Silva, hateten, VIII Governu Konstitusionál hatuur setór turizmu hanesan setór alternativu ba ekonomia rai-laran, ho ida-ne’e Governu halo esforsu maka’as dezenvolve sítiu turístiku sira atubele asegura kresimentu ekonomia ho efetivu, efisiente no sustentável hosi setór turizmu, nune’e bele halo diversifikasaun ekonomia.
“Ministériu Turizmu Komérsiu no Indústria dezenvolve fatin turizmu Rabilau nakfila ba turizmu komunitáriu, ne’ebé atu empodera no kapasita komunidade lokál hodi dezenvolve setór turizmu iha imi-nia área no hamosu na’in ba rekursu turístiku hodi proteje kultura no prezerva meiu-ambiente nu’udár atrasaun prinsipál ba atividade turizmu, bele kria kampu traballu no motiva komunidade hodi hasa’e espíritu negósiu iha área ospitalidade ba atendimentu vizitante no turista lokál, rejionál no internasionál,” Ministru relata liuhosi nota ne’ebé Agência Tatoli asesu, sesta ne’e.
Notísia relevante: Tinan 2022, MTCI identifika fatin turizmu komunitáriu 11 iha Timor-Leste
Ministru dehan, konseitu turizmu komunitáriu ne’e hatuur komunidade sai hanesan na’in no iha sentidu pertense iha dezenvolvimentu turizmu nia-laran tanba sustentabilidade, akuntabilidade no responsabilidade iha komunidade nia liman.
Nune’e, MTKI koopera ho grupu turizmu komunitáriu Warda hodi dezenvolvimentu fatin turizmu Rabilau. Tanba ne’e, governante ne’e husu ba komunidade Maubisse atu kuidadu no proteje areadór sítiu turístiku no fasilidade ne’ebé instala ona, ne’ebé presiza ema hotu nia kontribuisaun no responsabilidade.
Iha biban hanesan Koordenadór Warda, Adelino Mendonça, reprezenta komunidade hato’o agradese ba MTKI tanba tulun ona komunidade Maubisse dezenvolve fatin turizmu Rabilau sai fali ba turizmu komunitáriu.
“Sítiu turístiku ne’e dezenvolve tanba serbisu hamutuk entre komunidade Maubisse no ministériu liuhosi Diresaun Nasionál Turizmu komunitáriu no Kulturál, hahú iha tinan 2021. Fatin turístiku ne’e dezenvolve ho orsamentu hamutuk $41.070, ne’ebé hosi montante ne’e bele konstrui arka bem vindo, haris fatin, tanki bee-moos, instala eletrisidade ho solár painel, eskada ba pra-wedding, uma ba seguransa, infraestrutura no seluk tan,” nia informa.
Programa ne’e fó ona benefísiu ba komunidade lokál no prepara juventude sira atu sai na’in ba dezenvolvimentu foho Rabilau, nune’e iha futuru joven sira bele sente hanesan na’in ba fatin turizmu komunitáriu hodi kuidadu no garante sustentabilidade.
Jornalista : Arminda Fonseca
Editora : Julia Chatarina
