Top

PR Horta lansa kampaña nasionál kuda kafé iha Fatubesi

Prezidente Repúblika (PR), José Ramos Horta, sesta ne’e lansa kampaña nasionál kuda kafé iha suku Fatubesi, postu administrativu Hatulia B, munisípiu Ermera. Imajen/Midia PR.

DILI, 23 dezembru 2022 (TATOLI)—Prezidente Repúblika (PR), José Ramos Horta, sesta ne’e, lansa kampaña nasionál kuda kafé iha suku Fatubesi, postu administrativu Hatulia B, munisípiu Ermera.

Hafoin entrega enxada ba agrikultór sira, Xefe Estadu kuda simbolikamente kafé iha rai mamuk iha Fatubesi no husu ba agrikultór sira atu serbisu makaas liután.

Prezidente Repúblika (PR), José Ramos Horta, sesta ne’e lansa kampaña nasionál kuda kafé iha suku Fatubesi, postu administrativu Hatulia B, munisípiu Ermera. Imajen/Midia PR.

“Ita tenke trata kafé didi’ak, kafé na’in sira kuda kafé, konforme halo tuir tékniku sira hateten, tau matan ne’e, la’os de’it tinan-tinan ba ku’u kafé, lae. Ita atu ku’u hudi ruma tenke kuda hudi, rega ai-funan ne’ebé de’it, kafé mós hanesan, hamoos didi’ak, sanak sira tuan ne’e ita tesi, kuda bebeik para tinan 10 ka 20 mai, imi nia bei-oan sira mak iha kafé ne’e, se lae kafé lakon,” Xefe Estadu ne’e hateten bainhira hala’o lansamentu kampaña kuda kafé.

Tema bá programa ne’e mak HADOMI KAFÉ, KAFÉ ITA NIA KULTURA, tanba ne’e Xefe Estadu apela nafatin ba to’os-na’in no tékniku sira, atu halo tratamentu di’ak ba kafé, prevene atake peste hodi haforsa produsaun no tulun dezenvolvimentu ekonómiku.

Iha fatin hanesan, Sekretáriu Estadu Peska, Elidio de Araújo, ne’ebe reprezenta Ministru Agrikultura no Peska (MAP) no Prezidente Autoridade munisípiu Ermera, Eugébio Salsinha, elojia inisiativa hosi Prezidente Repúblika no parseiru sira-ne’ebé aposta ba melloria produsaun kafé iha Ermera.

“Ministériu Agrikultura sente kontente no orgullu tebes ho esforsu hosi Prezidente Repúblika, tanba pasu ida reabilitasaun, ohin loron ida-ne’e, inisia hatama tan kafé (Kampaña Nasionál Kuda Kafé) para atu aumenta, normalmente tenke kuidadu,” nia hateten.

Nia agradese mós empreza lokal sira hanesan NCBA ho Timor Global, ne’ebé halo ona fatin prosesamentu ba kafé no kualidade ba mundu internasionál.

Kampaña nasionál kuda kafé ne’e partisipa hosi Embaixador Brunei Darusalam, Nova Zelándia, menbru Parlamentu Nasionál balun, kargu  xefia  sira iha MAP, autoridade lokál  no to’os-na’in sira.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!