iklan

DILI, POLÍTIKA

Prezidénsia Repúblika apoiu nesesidade bázika ba família 24 iha Tibar

Prezidénsia Repúblika apoiu nesesidade bázika ba família 24 iha Tibar

Prezidénsia Repúblika apoiu nesesidade bázika ba família 24 iha Tibar. Imajen/Mídia PR.

DILI, 23 dezembru 2022 (TATOLI)—Prezidénsia Repúblika apoia nesesidade bázika ba família kbiit laek 24 iha aldeia Libau-Lelo, suku Tibar, postu administrativu Bazartete, munisípiu Liquiça.

Xefe aldeia Libu-Lelo, Domingos Serrão Fátima da Conceição, agradese laran luak hosi Prezidénsia Repúblika hodi tulun família vulneravél.

“Nu’udar autoridade lokál no reprezentante xefe suku agradese tebes fó parabéns Prezidente Repúblika ho nia ekipa tomak, hanesan aman ne’ebé hadomi duni nia povu ida-ne’e, ami orgullu tebes,” Xefe Aldeia hateten liuhosi komunikadu imprensa ne’ebé Agéncia Tatoli asesu, sesta ne’e.

Domingos Serrão husu ba Prezidente Repúblika atu kontinua implementa programa umanitária, hodi tulun sidadaun hotu.

“Ha’u-nia mensajen ba Prezidente mak ne’e, programa ida-ne’e labele para iha ne’e de’it maibé se karik bele programa ne’e la’o nafatin ba oin, keta iha susesu nafatin, ami iha autoridade lokál prontu apoiu progama ida-ne’e,” Serrão hateten

Reprezentante komunidade Aldeia Libau-Lelo, Bere Huno, hanesan mós veteranu agradese inisiativa hosi Prezidénsia Repúblika.

“Ohin loron hanesan grasa Maromak nian, tanba bele hetan apoiu hosi Prezidente Repúblika, mai ami atan-oan sira, ha’u mos katuas ona, lori buat ida mós labele, ne’e duni Maromak tulun Prezidente bele mai ajuda,” nia hateten.

Adjunta Xefe Kaza Sivil Prezidénsia Repúblika, Henriqueta da Silva hateten, apoiu ne’e reprezenta Prezidente Repúblika nia domin ba povu hotu, hodi selebra natál no tinan foun.

“Ho sasán uitoan ne’ebé karik mak la boot liu, maibe atu lori de’it domin Prezidente nian ba sira, atu hatudu katak Prezidente Repúblika hamutuk hela ho sira iha situasaun saida de’it liu-liu festeza natál ho tinan foun,” nia dehan.

Asaun karitativa ne’e atu fanu mós ema seluk ne’ebé iha kbiit natón hodi tulun sidadaun ne’ebé presiza no kontribui mós ba dezenvolvimentu nasionál.

Sasan ne’ebé distribui hosi Adjunta Xefe Kaza Sívil no Asesór Prezidénsia ba Asuntu Sosiál, Quintiliano Moniz, ba sidadaun sira mak hanesan foos saka 24, supermie dos 24, mina-tein inklui sasán sira seluk tan.

Hosi benefisiáriu sira, Veteranu Bere-Huno mak hetan apoiu espesiál hanesan nesesidade bázika, kadeira meza, kulxaun, rice cooker no buli chock.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!