DILI, 23 dezembru 2022 (TATOLI)–Xefe Suku Caicoli, postu administrativu Vera Crus, munisípiu Dili, Hipolito Ximenes, hateten ekipa pagamentu subsídiu fim do ano ba uma kain selu ona $200 ba benefisiáriu hamutuk 992 no rejista hela reklamnate na’in-hitu.
“Ami selu ona benefisiáriu hamutuk 992 no la simu hamutuk 185 ho nia osan $37.000 mak ami entrega ba Banku ona,” nia dehan ba Agência Tatoli, liu-hosi telefónika, sesta ne’e.
Hosi ema ne’ebé mak la simu ne’e, nia dehan, bele mai iha sede atu bele hadi’a no kofirma dadus nune’e bele simu fali sira-nia direitu ne’e.
Entratantu, iha suku Caicoli na’in-hitu mak tama lista reklamante ne’ebé kompostu hosi aldeia Zero Um, Zero Dois no aldeia Cinco iha rua no aldeia Zero Kuatru mak ida (1) de’it no aldeia Três laiha.
“Sira-ne’e tama ona lista reklamante tanba sira la mai ka naran iha suku Caicoli laiha maibé ami hein sirá na’in-hitu mai suku, ita hamutuk hodi hadi’a no submete fali para bele hetan nia direitu. Maibé husu nafatin ba Ministériu Administrasaun Estatál (MAE) no Ministériu Solidariedade Sosiál no Inkkuzaun (MSSI) atu ajuda konfirma dadus lista reklamante, nune’e ema bele hetan ninia direitu, tanba naran ne’ebé ita selu tuir lista nasionál nian,” nia dehan.
Jornalista : Osória Marques
Editór : Cancio Ximenes
