Uma-kain 220 iha Uaimori no Kai’wa hahú asesu eletrisidade
DILI, 23 dezembru 2022 (TATOLI)- Uma-kain hamutuk 22o iha suku Uaimori, postu Viqueque vila no aldeia Kai’wa, suku Liaruka, postu adiministrativu Ossu, munisípiu Viqueque asesu ona eletrisidade.
Prezidente Konsellu Administrasaun EDTL,E.P , Paulo da Silva, hateten, EDTL.E,P hahú instala no halakan ona eletrisidade ba komunidade sira iha suku Uaimori no aldeia Kai’wa atu hetan naroman iha loron boot Natal ida-ne’e.
“Ha’u husu abitante sira-ne’ebé asesu ona enerjia elétrika atu servisu nafatin ho EDTL.E,P bainhira iha avaria ruma husu favór kontaktu tékniku EDTL hodi halo intervensaun lalais,” Prezidente Konsellu Administrasaun ne’e, hateten ba Agência Tatoli via telefónika, sesta ne’e.
Iha biban hanesan, Diretór EDTL,E.P, Ermesto Sarmento, hateten abitante Uaimori no aldeia Kai’wa , komesa kuarta ne’e, Eletrisidade de Timor Leste, Empreza Públiku (EDTL.E,P) hahú lansa ka halo lakan eletrisidade atu komunidade sira iha area refere bele asesu.
Daudaun ne’e eletrisidade hahú lakan ona, maibe seidauk monta prepagu ba uma-kain sira, nune’e komunidade sira asesu eletrisidade.
Ofisializa halakan eletrisidade ba abitante sira iha Kaiua partisipa direta hosi Prezidente Konsellu Administrasaun EDTL,E.P. Paulo da Silva ho komunidade.
Aldeia Kai’wa ho totál uma-kain hamutuk 90 mak asesu ona sira nia direitu bá eletrisidade no suku Uaimori uma-kain 130 mós asesu ona eletrisidade.
Jornalista: Vitorino Lopes da Costa
Editór : Florencio Miranda Ximenes
