COVALIMA, 24 dezembru 2022 (TATOLI) – Administradór postu administrativu Fatumea, Geraldo Orleans, informa, idozu no invalidéz, iha postu administrativu Fatumea, sei simu subsídiu iha fulan-fevereiru tinan 2023.
“Ha’u foin simu dadus idozu no invalidéz hosi Sentru Solidariedade Sosial hamutuk na’in-480 no benefisiáriu bolsa da mãe 251 mak sei simu subsídiu hahú iha loron 20 to’o 24 fulan-fevereiru tinan 2023,” Geraldo Orleans informa ba Tatoli, iha Covalima, sábadu ne’e.
Tuir oráriu pagamentu subsídiu ba idozu no invalidéz iha loron (20/12/2022) , tanba foin lalais halo pagamentu subsídiu fim do ano, entaun la konsege halo pagamentu
Razaun seidauk konsege halo pagamentu ba idozu no invalidéz sira, tanba iha fulan-dezembru governu halo pagamentu subsídiu fim do ano ba uma-kain no programa distribuisaun cesta bázika.
Ho razaun hirak-ne’e governu la konsege halo pagamentu nune’e sei hahú halo pagamentu hikas iha fulan-fevereiru tinan 2023.
Bazea ba dekretu-lei númeru 19/2008 ,19 juñu , iha artigu 20 hateten, subsídiu apoiu ba idozu no invalidéz iha tinan 2020 to’o 2022 ne’e ho montante $50 kada fulan.
Jornalista:Celestina Teles
Editór: Evaristo Soares Martins
