IGE seidauk normaliza estrada Fatumea
COVALIMA 24 dezembru 2022 (TATOLI)–Institutu Jestaun Ekipamentu, Institutu Públiku (IGE,I.P sigla-portugés) seidauk normaliza estrada iha postu administrativu Fatumea, munisípiu Covalima.
Razaun seidauk halo normalizasaun tanba sei normaliza ponte Lomea, ne’ebé lokaliza iha suku Beco, postu administrativu suai, munisípiu Covalima.
Administradór postu administrativu Fatumea, Geraldo Orleans informa, tuir loloos IGE halo ona noramalizasaun estrada Fatumea, tanba foin lalais udan ponte Lomea ameasadu atu kotu.
“ Tuir loloos, sira halo ona normalizasaun estrada iha postu administrativu Fatumea ho kilómetru 28. Maibé ha’u kontaktu fali ema-ne’e la atende ha’u telefone, entaun seidauk halo normalizasaun estrada ba postu administrativu Fatumea,”Geraldo Orleans informa ba Tatoli, iha Covalima, sábadu ne’e.
Hafoin ekipamentu IGE foin mak halo normaliza estrada husi postu administrativu Tilomar, suku Beiseuk, aldeia Maubessi, bairru Hedi Besi.
Molok IGE atu normaliza estrada ba postu administrativu Fatumea tenke hahú uluk halo normalizaun estrada iha postu Tilomar, hafoin to’o iha Foholulik mak foin ba iha postu administrativu Fatumea.
Foin lalais udan ponte Lomea ameasadu atu kotu, IGE normaliza hikas ponte entaun to’o ohin-loron seidauk konsege normaliza estrada, iha postu administrativu Fatumea.
Postu administrativu Fatumea komposta hosi suku Fatumea, Belulik leten, suku Nanu ho total xefe família 1.041.
Joranlista:Celestina Teles
Editor: Cancio Ximenes
