DILI, 25 dezembru 2021 (TATOLI)— Padre Pároku Kapela Ulmera, Postu Bazartete, munisípiu Liquiça, Yosytaka Ura, hateten espíritu selebrasaun santo Natál hanorin sarani katóliku ka ema-hotu atu hatene haraik-an ka umildade hodi serbí malu ho domin no dame.
“Iha selebrasaun Natál ida ne’e hanorin ita hotu atu haraik-an hodi serbí malu hodi moris iha dame no domin nia laran, atu simu ita-nia kosok-oan Jesus Cristo, ne’ebé mak mai moris iha ita le’et’’, Padre Pároku ne’e hateten bainhira prezide misa iha Ulmera, dominggu ne’e.
Notísia relevante: Natál nu’udar festa esperansa
Selebrasaun Natál mós hanorin sarani katólika atu hakbesik an ba Maromak nia domin no Maromak nia espíritu atubele hetan rahun di’ak tanba Jesus Kristu mak grasa úniku ba sarani-sira nian.
“Ohin, loron ida ne’ebé nai Jesus moris tanba nia mak liurai mundu nian, nia mai fó esperansa ba ema hotu, liuhosi nia prezensa salva ema hotu nia sala”, katak nia.
Jesus nia moris ne’e simples loos tanba moris de’it iha bibi-luhan, maibé nia mak liurai mundu nian.
“Ita moris iha mundu labele halo aan liu, maibé haraik-aan ba ema hotu atu hetan valór iha Maromak nia oin iha Lalehan, nune’e iha loron espesiál ne’e iha ema ruma hirus malu bele dame malu ba atu simu Jesus mai iha ida-idak nia leet ho dame laiha hirus malu no ódiu malu”, Amu haklaken.
Nune’e, Amu Pároku ne’e husu ba sarani katólika-sira atu iha selebrasaun festa Natál ne’e tenke fó domin ba malu no perdua malu hodi hetan grasa Maromak nian.
Notísia relevante: Don Norberto: “Tenke hatene agradese ba ema-ne’ebé ajuda ita”
Jornalista: Hortencio Sanchez
Editór : Florencio Miranda Ximenes
