DILI, 27 dezembru 2022 (TATOLI)—Abitante iha suku haat iha postu administrativu Ossu, munisípiu Viqueque asesu ona eletrisidade.
“Foin lalais iha loron 23 dezembru 2022, Eletricidade de Timor Leste, Empreza Públika (EDTL, E.P) loke ona ahi eletrisidade ne’ebé liga ba suku haat hanesan Uaibobo, Nahareka, Uabubo no Builo no abitante sira asesu ona. Sira la asesu eletrisidade durante tinan barak nia laran,” Administradór postu Ossu, Sebastião Fereira Pires, informa ba Agência Tatoli, via telefónika, tersa ne’e.
Tuir Autoridade postu, maski EDTL, E.P instala ona eletrisidade permanente maibé seidauk halo inaugurasaun, enkuantu ekipa téknika halo hela instalasaun eletrisidade iha suku Nahareka maibé ahi seidauk lakan no ahi suku Liaruka agora seidauk lakan.
“Daudaun ahi mate lakan hela, ne’ebé daudaun ita tenke kontinua halo kontrolu,” nia akresenta.
Notísia relevante: Tinan 2023, EDTL, E.P fó prioridade hadi’a kualidade fornesimentu enerjia elétrika
Uma-kain hamutuk 1.000 resin hosi suku haat mak asesu ona eletrisidade.
“EDTL, E.P tenke liga mós hanesan Uatamata, Bubulaku, Waikeli, maibé to’o agora sira seidauk tau prioridade ba liña eletrisidade hodi komunidade bele asesu,” nia akresenta.
Iha fatin ketak, Xefe suku Uaibobu, Joanivo Maria A. da Cruz, agradese tanba abitante iha uma-kain 372 asesu ona eletrisidade, ne’ebé hela uma-kain ualu iha aldeia Dauboruba no uma-kain 20 iha aldeia Osogori maka seidauk asesu eletrisidade.
“Ha’u sente agora komunidade asesu ona eletrisidade ho di’ak, maibé iha ha’u-nia suku, iha aldeia rua maka seidauk asesu. Nune’e mós ha’u haree empreza instala fiu ladún di’ak ne’ebé presiza haree hodi hadi’a tutuir atu ahi labele mate lakan,” nia hato’o.
Iha suku Builo ahi eletrisidade kobre aldeia tolu hanesan Lalabu, Builo no Abana, no obra implementa hosi empreza Zahine Unip, Lda JV Bozer konstrusaun Unip Lda, suku Nahereka iha aldeia Abana-Watumaluli mak asesu ona no implementa hosi empreza Uai-cana Unip,Lda JV Esmelia II Electric Unip.Lda, suku Uabubo kobre aldeia tolu hanesan Tagaba-Dasinaha, Dalirisi-Sede no Suco Uabubo ne’ebé implementa husi empreza Lufiamor Unip,Lda JV Chagas 55 Unip.Lda no suku Waibobo aldeia Abana-Lekibuti mak asesu ona, ne’ebé implementa hosi empreza Minro Vinda Unip.Lda JV Esmelia II Electric Unip.Lda.
Jornalista : Vitorino Loped da Costa
Editora : Julia Chatarina
