iklan

EKONOMIA, HEADLINE

Tinan 2023, EDTL, E.P fó prioridade hadi’a kualidade fornesimentu enerjia elétrika

Tinan 2023, EDTL, E.P fó prioridade hadi’a kualidade fornesimentu enerjia elétrika

Tékniku EDTL, E.P halo instalasaun liña eletrisidade iha área Colmera, segunda (25/10/2021). Imajen Tatoli/António Gonçalves

DILI, 01 dezembru 2022 (TATOLI)—Prezidente Konsellu Administrasaun Eletricidade de Timor-Leste (EDTL, E.P), Paulo da Silva, hateten, empreza estatál ne’e sei fó prioridade hadi’a kualidade fornesimentu enerjia elétrika ba povu iha tinan 2023.

“Prioridade ba tinan oin, ita kontinua hadi’a fornesimentu enerjia elétrika no kualidade, kontinua tau matan ba projetu dijitalizasaun, aselera implementasaun programa eletrifikasaun nasionál hodi bele kobre suku no aldeia sira iha territóriu laran,” Prezidente Konsellu Administrasaun EDTL, E.P informa ba Agência Tatoli, liuhosi programa entrevista eskluziva, iha stúdiu Farol, kinta ne’e.

Enkuantu, programa dijitalizasaun liña eletrisidade hahú iha tinan ne’e, seidauk iha progresu fíziku maibé hahú ho prosesu aprovizionamentu.

“Daudaun Konsellu Nasionál Aprovizionamentu (CNA, sigla portugés) halo ona prosesu tanba projetu ne’e finansia hosi fundu empréstimu, entaun tenke jere hosi Ministériu Finansa. EDTL, E.P só tau-matan ba ninia implementasaun servisu operasionál no tékniku,” nia akresenta.

Notísia relevante: EDTL promete populasaun tomak asesu enérjia elétrika iha 2023

Aleinde ne’e, EDTL, E.P kontinua hadi’a kontrolu no inspesaun ba kliente sira hodi hasa’e reseita, no iha biban hanesan halo instalasaun iluminasaun iha dalan públika sira, nune’e sosiedade bele halo atividade ekonómika ho di’ak.

“Instalasaun iluminasaun iha dalan públiku sira, aleinde bele rezolve kestaun sosiál, bele ajuda rezolve mós atividade ekonómika kiik-oan sira hanesan ema bele fa’an no loke kios iha dalan sira,” nia tenik.

Daudaun ne’e EDTL, EP instala iluminasaun iha fatin 23 iha kapitál Dili, hahú tinan kotuk to’o agora.

“Halo hotu ona instalasaun maibé iha lampu balun tuan, entaun mate, maibé ita kontinua hadi’a no troka. Ne’e la’ós ita halo de’it iha Dili, maibé mós ba munisípiu lima hanesan Baucau, Lautém, Manatuto, Covalima no Liquiçá ne’ebé ita konklui ona 100%. Agora ita prepara fali ba munisípiu seluk ne’ebé seidauk,” Prezidente Konsellu Administrasaun EDTL, E.P informa.

Empreza estatál ne’e nia konsentrasaun seluk ba tinan oin mak realiza investimentu solar photovoltaic  (PV), iha tinan oin.

Iha sorin seluk, Prezidente Konsellu Administrasaun husu ba públiku hotu atu kuidadu uza enerjia elétrika tanba setór eletrisidade ne’e la’ós EDTL, E.P nian maibé Estadu nian.

“Hakarak funsionamentu setór ida-ne’e la’o ba oin nafatin ho di’ak, mai ita koopera kontribui iha ida-idak ninia parte atubele garante kontinuasaun di’ak liu iha futuru,” Paulo apela.

Nia husu mós ba kliente EDTL, E.P, bainhira hasoru problema téknika iha uma ka ne’ebé de’it, bele bolu ekipa téknika sira hodi halo intervensaun no labele halo ligasaun direita tanba bele prejudika an rasik no sei selu multa.

“Mai ita hamutuk lori setór ida-ne’e ba oin ho objetivu dezenvolvimentu ba nasaun nian,” nia konvida.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!