BOBONARO, 23 setembru 2022 (TATOLI)—Prezidente Konsellu Administrasaun Eletrisidade Timor-Leste, Empreza Públika (EDTL, E.P), Paulo da Costa, garante iha tinan 2023 populasaun iha territóriu nasionál sei asesu enérjia elétrika.
Paulo hato’o promesa ne’e ba komunidade Cailaco iha ámbitu diálogu nasionál entre oranizasaun sosiedade sivíl no VIII Governu Konstitusionál, ne’ebé partisipa hosi Ministru Prezidénsia Konsellu Ministru, Fidelis Manuel Leite Magalhães, ne’ebé realiza iha foho Loe-Lacu, área Poerema, aldeia Liabote, suku Meligo, postu administrativu Cailaco, munisípiu Bobonaro, kinta ne’e.
Nia fó-sai katak, semana kotuk konsellu administrasaun EDT aprova ona polítika hanaran projetu komunitária entre tékniku sira ho komunidade nune’e enérjia elétrika tenke to’o hotu komunidade nia uma.
Notísia relevante: PM fó orientasaun ba EDTL “tinan ne’e suku hotu tenke asesu enérjia elétrika”
“Dentro um kilómteru to’o kilómteru tolu ita serbisu hamutuk, entaun saida mak ita sei halo EDTL prevee osan ba mão de obra, atu komunidade sira kontribui serbisu bele hetan insentivu depois EDTL mobiliza materiál no selu tékniku sira, tanba ita-nia tarjetu fim de ano 2023 hotu-hotu iha Timor laran bele asesu ona enérjia elétrika,” nia promete.
Paulo dehan, iha mandatu VIII Governu Konstituisionál konsege promove projetu eletrifikasaun faze tolu, dahuluk hamutuk pakote 34 kobre suku 22 ne’ebé agora daudaun konstrusaun la’o hela no balun finaliza ona tanba atinje ona por volta 60% to’o 80% tuir progresu serbisu sei konklui fulan ida ka rua tán.
Enkuantu iha faze daruak ho pakote 44 kobre suku 22, nune’e parte empreza asina ona kontratu ho EDTL ne’ebé balu tama daudaun ne’e ona faze mobilizasaun materiál, inklui suku Dato-Rua ne’ebé halo inaugurasaun ona iha semana kotuk.
Nune’e mós faze datoluk totál 36 pakote kobre suku 23, ne’ebé daudaun ne’e prosesu avaliasaun tékniku no finánsia la’o hela, ne’ebé tuir planu semana ida ka rua konklui atu asina kontratu ho empreza responsável sira nune’e bele hahú ona halo konstrusaun.
“Iha suku tolu maka foin daudaun mak ha’u aprova no semana ida tán ita lansa konkorsu maka ida iha Fatuk-Ahi, Same, ida seluk Fatuk-Makerek, Manufahi no ida iha Fatumea, Covalima ne’ebá, ida-ne’e la kleur lansa, ita konklui suku hotu-hotu nia prosesu sira, fim do ano ita bele maiór parte asesu ona enérjia elétrika,” nia hateten.
Nia dehan, EDTL transforma-aan ona ba empreza públika oinsa mak atu hatún kustu produsaun ba setór eletrisidade tanba tinan-tinan governu aloka millaun $6-resin sosa gazoel ba sentrál elétrika Hera no Betano hodi distribui enérjia elétrika ba timor laran tomak.
Iha tinan kotuk EDTL promove estudu renovavel solar painel ne’ebé sei konklui iha fulan ida ne’e, tanba semana kotuk relata ona rezultadu temporária ba Konsellu Ministru no iha tempu besik sei halo ezersísiu atubele promove ba projetu enérjia renovável iha munisípiu Manatuto pur volta 72 MW tuir estudu ne’ebé indika ona.
Nune’e mos halo ona estudu kona-bá enerjia ‘ar’ ne’ebé sei konsentra atu ba haree potensialidade ‘anin’ iha área sira-ne’ebé iha hodi bele promeve solar painel ne’e rasik, ida seluk tan mós idro-elétrika ne’ebé tuir planu sei implementa iha tinan oin.
“Mais tinan ida ne’e ita sei hahú prosesu preparasaun ba konkursu solár painél, atu tinan oin ita halo konstrusaun planta solár painél iha Manatuto. Ida-ne’e sei ajuda halo poupansa ita-nia despeza tinan-tinan ne’ebé gasta ba sosa gazoél,” nia akresenta.
Bainhira planu hirak-ne’e konklui ona, EDTL mós hakarak hadi’ak kualidade fornesimentu enérjia elétrika tanba tinan ne’e atu promove ona serbisu moderniza no dijitaliza sistema ba iha liña distribuisaun sira iha timor laran tomak, liuliu iha kapitál sira.
Nia fó-sai katak, tuir lei eletrisidade direitu baziku ba komunidade sira maibé tinan kotuk EDTL deteta kliente rihun 35 mak halo ligasaun direita, la uza kontadór hodi la selu taxa.
Maske nune’e esforu ne’ebé EDTL halo maka iha tinan kotuk konsege halo akizisaun sosa kontadór prepagu hamutuk rihun 108 ne’ebé iha fulan kotuk konsege instala ona rihun 78 kontadór iha territóriu nasionál.
“Ida-ne’e ajuda ita, tanba uluk sei iha diresaun jerál kada fulan ita kolleta de’it millaun $2,6 to’o millaun $2,7, depois ita instala kontadór ita-nia reseita sa’e ba millaun $6,7, entaun ita-nia projesaun ba tinan ida-ne’e ita projeta ba reseita millaun $40. Uluk másimu millaun $30 to’o millaun $33, maibé tinan ida-ne’e projeta to’o millaun $40, maibé ho ritmu ne’ebé ohin ha’u mensiona sei bele to”o millaun $45,” nia katak.
Notísia relevante: EDTL sei instala jeradór rua fasilita diálogu nasionál iha Poerema
Jornalista : Sérgio da Cruz
Editór : Evaristo Soares Martins
