iklan

EKONOMIA, BOBONARO, HEADLINE, MUNISÍPIU

PM fó orientasaun ba EDTL “tinan ne’e suku hotu tenke asesu enérjia elétrika”

PM fó orientasaun ba EDTL “tinan ne’e suku hotu tenke asesu enérjia elétrika”

Primeiru Ministru, Taur Matan-Ruak. Imajen Tatoli/Sérgio da Cruz.

BONONARO, 16 setembru 2022 (TATOLI)—Primeiru Ministru,Taur Matan Ruak, fó orientasaun ba Eletrisidade Timor-Leste (EDTL) katak tinana 2022 ne’e suku hotu tenke asesu enérjia elétrika nune’e fó roman ba komunidade sira iha tempu kalan.

Xefe governu fó-sai katak, hosi suku 452 falta suku 74 mak seidauk asesu enérjia elétrika maibé oras ne’e governu esforsu hela atu kobre hotu

Notísia relevante: EDTL selebra akordu ho IPG no IGE fornese servisu di’ak liu

“Ha’u-nia mandatu tinan oin hotu ona, anggaran tinan tolu de’it (2019, 2021 no 2022) no tinan oin kompleta tinan haat, maibé ha’u-nia orientasaun ba señor prezidente EDTL, katak tinan ida-ne’e suku hotu-hotu iha timor laran tenke iha ahi,” Xefe governu halo promesa ne’e iha ámbitu inaugurasaun merkadu Hali-Mesak, suku Odomau, postu administrativu Maliana, munisípiu Bobonaro, sesta ne’e.

Xefe Governu ne’e subliña, hafoin kobre suku hotu tuir planu sei kontinua halo instalasaun ba aldei hotu, liuliu sira-ne’ebé iha liu área rural ho fazeadamente tanba iha de’it orsamentu natoon.

Tanba gastu ba eletrisidade ne’e karun liu, tanba daudaun ne’e gasta mina litru rihun 350-resin, ne’ebé kada loron funsiona jeradór iha sentrál elétrika Hera, Betano hodi fornese enérjia elétrika ba timor laran tomak.

“Ne’e kada loron ita bele gasta $400.000 ba mina, ne’e loron ida de’it, fulan ida hira no tinan ida hira tiha ona, imi sura took. Sorte Maromak tulun ita mina iha, se lae ita ohin ne’e problema, ita sosa litru ida tau motorizada mos dada iis tia ona, uluk $1, agora $1,61 tiha ona, besik $2,” Xefe governu informa.

Prioriza estrada

Iha parte seluk, Xefe governu esplika, planu ba oin sei tau prioridade ba estrada, hahú hosi Munisípiu Bobonaro ba to’o Fatumea, Fatululik no Fohorem, munisípiu Covalima.

Maibé sei lori tán tempu uitoan tanba agora sei hahú hela iha Lospalos ba Iliomar, Uatu-Carabau, Uatulari, Viquque ba Lakluta, munisípiu Viquque.

“Ita-nia planu ne’e tenke estrada di’ak, fera iha klaran depois ba munisípiu sira neineik-neneik to’o hotu,” nia promete.

Iha loron kuarta ne’e, Konselu Ministru deside aprova hodi autoriza prosedimentu aprovizionamentu nian, kona-bá konkursu públiku internasionál no realizasaun despeza ba obra públika sira kona-bá reablitasaun estrada hosi Manatuto ba Laclo ho valór estimasaun $8.315,330.43.

Estrada hosi munisípiu Aileu (Becluru) ba Lequidoe to’o Laclo, munisípiu Manatuto, ho valór estimasaun $25,124.925.51. Enkuantu estrada hosi Alas ba Wedaberek, munisípiu Manufahi ho estimasaun valór globál $23,232.29.32.

Estrada urbana Maliana, munisípiu Bobonaro pakote I ho estimasaun valór globál $16,314.392 no estrada Urbana pakote II ho estimasaun valór globál $23,598.019,36.

Nune’e mós reabilitasaun seksaun hosi Laga ba Baguia pakote IV estrada munisipál sira, seksaun hosi Quelicai ba Ossu pakote III estrada munisipál sira.

Notísia relevante: EDTL, E.P halo diálogu ho komunidade suku Rotutu kona-ba liña eletrisidade

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!