iklan

HEADLINE, KAPITÁL, NASIONÁL

EDTL selebra akordu ho IPG no IGE fornese servisu di’ak liu

EDTL selebra akordu ho IPG no IGE fornese servisu di’ak liu

Ministru Ministru Obra Públika, Abel Pires da Silva. Imajen TATOLI/Francisco Sony

DILI, 27 juñu 2022 (TATOLI)Eletricidade de Timor-Leste, Empreza Públika (EDTL, E.P), segunda ne’e, selebra akordu servisu ho Institutu Petróleu no Jeolojia, Institutu Públiku (IPG,I.P sigla portugés) no Institutu Jestau Ekipamentu, Institutu Públiku (IGE, I.P, sigla portugés) hodi fornese servisu di’ak liután ba públiku.

“Iha sira-nia (EDTL) servisu loron-loron atu serbí ita-nia rain ne’e sira presiza apoia rua, ezemplu IGE nia servisu karik halo intervensaun iha kondisaun emerjénsia ruma ba fasilidade ne’ebé EDTL jere hela. Enkuantu kona-ba torre ne’ebé sei estabelese presiza apoia hosi IPG tanba sira mak iha knaar atu haree katak rai sira ne’e iha duni kondisaun ka lae, ne’ebé liuhosi akordu ne’e bele fasilita servisu EDTL di’ak liután,” Ministru Obra Públika, Abel Pires da Silva, hateten hafoin asiste instituisaun tolu asina akordu, iha salaun MOP, Caicoli.

Notísia relevante: EDTL, E.P hahú instala iluminasaun iha estrada protokolu

Nia dehan, durante ne’e apoia servisu sira ne’e la’o hela maibé atu kontinua di’ak liután presiza liuhosi akordu servisu ida.

Iha biban hannesan, Prezidente Konsellu Administrasaun EDTL, E.P, Paulo da Silva, reforsa, asina akordu ne’e atu formaliza kooperasaun ne’ebé antes ne’e hala’o ona.

“Ho nune’e presiza legaliza ho baze legál ruma, nune’e sai mata-dalan hodi guia ita halo servisu di’ak liután,” nia akresenta.

Aleinde ne’e, nia konsidera akordu ne’ebé halo ho IGE importante tebes tanba durante ne’e halo ona servisu lubuk hodi apoia másimu, liuliu iha situasaun emerjénsia sira liga ho torre sira ne’ebé  krítiku tebes iha territóriu laran.

“Tanba ne’e sei iha nesesidade lubuk ida hodi haree hamutuk ba oin, inklui transportasaun mákina pezadu sira no mós formasaun kona-ba mekánika, ho servisu sira ne’e sai razaun ba ita iha kooperasaun”, nia dehan.

Enkuantu ho IPG, presiza kolaborasaun tanba EDTL iha hanoin atu harii torre no parke ba enejia iha futuru, tanba torre sira daudaun ne’e krítiku entaun presiza iha estudu jeolójiku ida kona-ba rai no fatin sira.

“Nune’e ami bele hetan rekomendasaun ba fatin sira ne’ebé seguru tanba daudaun torre sira ne’ebé lokaliza iha territóriu Timor ameasadu no susar tebes ba ami atu haree tanba laiha koñesimentu kona-ba kualidade rai no fatin sira,” nia subliña.

Estatutu EDTL hatúr katak bainhira hakarak halo kooperasaun tenki legaliza ho nota entendimentu ida no hetan autorizasaun hosi ministériu tutela.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!