Padre José António da Costa baixa iha ICU HNGV
DILI, 27 dezembru 2022 (TATOLI)— Padre Pároku ba Parókia Nossa Señora Imaculada da Conceição, Katedrál, Díli, Mgr. José António da Costa, ho idade 82, baixa iha sala kuidadu intensivu (ICU), Hospitál Nasionál Guidu Valadares (HNGV) tanba sofre diabetes no tensaun.
Xefe Departamentu ICU HNGV, Vidál de Jesus Lopes, dehan Amo José AntÓnio da Costa nia kondisaun krítiku tebes tanba sofre diabetes ho tensaun.
“Informasaun ne’ebé espalla iha públiku katak amu mate ne’e la loos tanba ne’e husu ba sarani sira hotu katak amu seidauk mate, maibé kondisaun agora sei kritiku nia laran”,Xefe Departamentu ICU ne’e hateten ba Jornalista sira iha HNGV, tersa ne’e.
Amu José António tama HNGV iha loron 23 dezembru 2022 ho kondisaun ne’ebé grave.
”Informasaun ne’ebé mak família sira hato’o katak semana ida ona, Amu la han no hemu tanba família deside lori mai HNGV hodi halo atendimentu, maibé nia nivel konsiénsia hahú menus ona entaun husi ne’e kedas médiku sira halo intervensaun no daudaun ne’e iha ICU signifika apoia ona ventilador hodi halo nia dada iis”, katak nia.
Nia esplika, Amu nia órgaun sira ladun funsiona di’ak tanba sofre diabetes ho tensaun ne’ebé grave tebes.
“Tanba ne’e, ami nafatin mantein ho ai-moruk no disponibildade rekursu ne’ebé mak ho adekuadu tanba ne’e loron rua ikus, ami halo ona avaliasaun husi nia isin rasik ba medikamentu no tratamentu ne’ebé mak ami fó, maibé ladun di’ak signifika iha faze krítiku nia laran”, katak.
Nia dehan : “Ita haree nia kondisaun no idade la kritériu atu halo transferénsia ba rai-liur. Nune’e ami tenke públika ba publiku no sarani sira hotu hodi hatene situasaun ida ne’e katak porsentu ki’ik liu atu ita salva Amu”, nia akresenta”.
Jornalista : Felicidade Ximenes
Editór : Florencio Miranda Ximenes
