OÉ-CUSSE, 27 dezembru 2022 (TATOLI)–Sekretária Rejionál ba Asuntu Edukasaun no Solidariedade Sosiál, Avelina da Costa, hateten totál uma-kain hamutuk 21.383 iha Rejiaun Administrativa Espesiál Oé-Cusse Ambeno (RAEOA), sai benefisiáriu ba subsidiu $200 ho orsamentu ne’ebé aloka hosi Governu Sentrál liuhosi Ministériu Administrasaun Estatál (MAE) hamutuk $4,276.800 .
“Ita RAEOA fahe ba sub-rejionál haat no suku 18 maka sai benefisiáriu atu hetan subsidiu $200, karik sira-ne’ebé naran laiha lista pagamentu, ofisiál tékniku sira prepara ona lista reklamante, nune’e bele rezolve iha faze tuir mai,” dehan Avelina da Costa, ba Agência Tatoli iha Oé-Cusse, tersa ne’e.
Nia informa, abertura pagamentu ba subsidiu $200 iha RAEOA, realiza ona iha semana kotuk 21 dezembru, daudaun ne’e ekipa tékniku sira hamutuk ho autoridade lokál sira hala’o hela pagamentu iha suku ida-idak no hetan akompãna direta hosi Ofisiál Polísi Suku (OPS).
“Benefisiáriu ne’ebé iha direitu atu simu só sidadaun ne’ebé hetan rendimentu menus hosi $500, tanba lei la autoriza sidadaun ne’ebé maka hetan rendimentu liu $500, ne’e laiha diretu atu simu subsídiu ne’e, tanba ekipa pagamentu kolabora ho instituisaun CAC, PDHJ hodi asegura prosesu durante pagamentu la’o,” nia afirma.
Iha sorin seluk, xefe suku Costa hosi sub-rejiaun Pante Makasar, Aleixo Abi, agradese ba VIII Governu tanba iha polítika di’ak, bele apoia komunidade hodi bele utiliza apoiu haksolok hamutuk ho família iha festa Natál 2022 no tinan foun 2023.
“Primeiru ita agradese ba mandatu Governu ida-ne’e, tanba nia programa ho polítika di’ak, bele fasilita komunidade kada uma-kain simu $200 dollar, nune’e uma-kain ida-idak bele kontenti hamutuk hodi hasoru Nai Jesus nia loron moris hanesan Natál no tinan foun,” nia orgullu.
Entretantu, bazea ba dekretu-lei númeru 37/2022, loron 25 maiu, artigu 2, kona-bá benefisiáriu sira ba subsidiu ne’e hanesan uma-kain sira-ne’ebé rejistadu ona iha livru rejistu uma-kain iha suku iha territóriu nasionál tuir termu previstu iha diploma ministeriál númeru 47/2017, 23 agostu.
Ba efeitu númeru anteriór, konsidera katak hirak ne’ebé rejistadu ona iha livru rejistu uma-kain ne’e hanesan sira-ne’ebé mak rejistu ona uma-kain no rejistu válidu to’o 28 agostu 2022.
Notísia relevante: Aban, Governu sei lansa pagamentu subsídiu $200 iha Dili
Jornalista : Abílio Elo Nini
Editora : Rita Almeida
