BAUCAU, 28 dezembru 2022 (TATOLI) – Ema ida ho inisiál JGX idade 50 resin, to’o ohin loron, seidauk hetan no hatene nia paradeiru, suspeitadu Mota lalin, iha aldeia Itidau, suku Teknomata, postu administrativu Laga munisípiu Baucau.
Kronolojia, tuir Diretór serbisu munisipál protesaun sívil no dezastre naturál, Nelson Nunes, kazu ne’e akontese iha loron sábadu, 24 dezembru purvolta oras 15:00 (lorokraik) bainhira vítima atu fila ba uma maibé iha bibi rua mak hela iha mota-sorin nune’e atu duni ba luhan derrepente bee mota tuun hodi rezulta vítima lakon to’o ohin loron.
“Ekipa konsege hetan mak vítima ninia sasán hanesan mama-fatin, sumbrellu, roupa. Maibé, to’o ohin loron vítima nia isin seidauk hetan,” Ezekutivu serbisu munisipál protesaun sívil no dezastre naturál informa ba Agência TATOLI iha Vila nova, kuarta ne’e.
Hafoin akontesementu, tuir nia, parte Protesaun sívil no dezastre naturál munisípiu Baucau diretamente koloka kedas ekipa Bombeiru inklui Krus Vermella Timor-Leste (CVTL, sigla Portugés) ba fatin akontesementu hamutuk ho autoridade lokál no komunidade buka tuir vítima maibé seidauk hetan to’o ohin loron.
Protesaun sívil no dezastre naturál Baucau kompromete sei apoia umanitária ba família iha prosesu funebre bainhira vítima nia isin hetan ona.
Responsável másimu Serbisu Munisipál Protesaun sívil no dezastre naturál , Baucau, Nelson Nunes apela ba komunidade atu kontinua prevene aan hosi dezastre liuliu iha tempu udan hanesan minimiza halo atividade iha mota-ninin, tasi no foh- lolon.
Entretantu, iha périodu 2022, falta loron haat ba tinan 2023 ne’e, Serbisu Munisipál Protesaun Sívil no Dezastre Naturál Baucau rejista kazu hamutuk 209. Kazu sira ne’e mak hanesan anin sobu uma, rai-halai no inséndiu.
Jornalista : Natalino Belo
Editór : Rafael Ximenes de A. B.
