DILI, 28 dezembru 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova proposta dekretu-lei kona-ba rejime jurídiku klasifikasaun no inventariasaun bens interese kulturál no regra sira ne’ebé aplika ba esportasaun no importasaun, ne’ebé aprezenta hosi Ministru Ensinu Superiór Siénsia no Kultura, Longuinhos dos Santos.
“Diploma ne’e ho ninia objetivu atu prezerva, defeza no valorizasaun bens móvel, konjuntu ba bens móvel no imóvel sira ne’ebé klasifika ka propoin klasifikasaun no ba bens imóvel sira ne’ebé tama iha zona protesaun nian,” Ministru Prezidénsia Konsellu Ministru, Fidelis Manuel Leite Mangalhães, relata hafoin reuniaun ezekutivu ba dala-ikus nian ba tinan 2022, ne’ebé prezide hosi Vise Primeiru-Ministru no Ministra Solidaridade Sosiál no Inkluzaun, Armanda Berta dos Santos, iha Palásiu Governu.
Notísia relevante: PM lansa rekuñesimentu “tais” sai patrimóniu kulturál mundiál
Governu konsidera, Timor-Leste presiza dekretu-lei ne’e tanba iha regra internasionál ida hodi kontrola materiál kulturál sira hotu, entaun Timor-Leste tenke iha instrumenetu legál nasionál atu jere patrimóniu kulturál sira.
“Ita presiza regra klaru nune’e bainhira ema seluk mai hanesan kolektór materiál kulturál labele halo forma ilegál hanesan foti sasán sira ba rai-li’ur no labele loke dalan ba ita atu sosa fali materiál kulturál ho forma ilegál hosi rai-li’ur mai rai iha ita-nia rai,” governante ne’e akresenta.
Durante ne’e Governu nota katak muzeu sira dala-barak servisu hamutuk lori sasán kulturál sira hosi nasaun ida bá nasaun ida hanesan hatudu (sasán display) hotu lori fila ba nia nasaun maibé labele halo forma ilegál.
Nune’e, KM mós aprova projetu dekretu-lei ba alterasaun dahuluk ba dekretu-lei númeru 33/2017, loron 06 setembru, kona-ba rejime jurídiku patrimóniu kulturál ne’ebé aprezenta hosi Ministériu Ensinu Superiór Siénsia no Kultura (MESSK).
“Diploma ne’e ho ninia objetivu atu introdús melloria iha prosedimentu klasifikasaun patrimoniál no halo alterasaun ba norma kona-ba direitu proprietáriu, na’in, titulár direitu reál sira seluk kona-ba bens ne’ebé klasifika ka propoin ba klasifikasaun,” nia dehan.
Jornalista : Arminda Fonseca
Editora : Julia Chatarina
