DILI, 28 dezembru 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova proposta kona-ba prosedimentu aprovizionamentu ba reabilitasaun no manutensaun estrada Habuilico-Letefoho, munisípiu Ermera ne’ebé aprezenta hosi Ministru Obra Públika, Abel Pires da Silva.
“Projetu ida-ne’e finansia hosi Banku Mundiál liuhosi fundu empréstimu hamutuk millaun $25,5” Ministru Prezidénsia Konsellu Ministru, Fidelis Manuel Leite Mangalhães, hateten hafoin reuniaun ezekutivu ba dala-ikus nian ba tinan 2022, ne’ebé prezide hosi Vise Primeiru-Ministru no Ministra Solidaridade Sosiál no Inkluzaun, Armanda Berta dos Santos, iha Palásiu Governu.
Notísia relevante: Autoridade-sira hein IGE ateru estrada Letefoho-Gleno
Ministru dehan, konstrusaun estrada Hatubuilico-Letehofo ne’e hanesan projetu prioridade ba VIII Governu tanba bele lori diversifikasaun ekonómika, liuliu iha setór turizmu.
“Área ne’ebá furak tebes ba dezenvolvimentu setór turizmu iha Timor-Leste no produsaun produtu lokál hanesan modo sira. Ita espera liuhosi konstrusaun no manutensaun ida-ne’e bele fasilta komunidade no ita bele loke liután dalan ba diversifikasaun ekonómika iha Timor-Leste,” nia akresenta.
Nune’e, reabilitasaun no manutensaun estrada Habuilico-Letefoho ne’e rasik ho naruk hamutuk kilómetru 11 + metru 900 to’o kilómetru 30 + metru 307,88.
Jornalista : Arminda Fonseca
Editora : Julia Chatarina
