Governu-UNFPA finaliza ona atividade sensu uma-kain 2022
DILI,28 dezembru 2022 (TATOLI)— Governu liuhusi Diresaun Nasionál Estatístika hamutuk ho Parseiru Desenvolvimentu Fundu Populasaun Nasaun Unida (UNFPA), kuarta ne’e, konklui ona atividade sensu uma-kain 2022.
“Ita hotu hatene katak sensu fornese mai ita dadu atualizadu kona-ba ita nia populasaun rasik no ajuda hodi responde ba kestaun polítika sira ne’ebé mak iha”, Ministru Finansa, Rui Augusto Gomes dehan iha seremonia enseramentu ba atividade sensu uma-kain 2022, iha edifísiu Diresaun Nasionál Estatístika, Caicoli-Dili.
Sensu uma-kain iha territóriu nasionál hanesan instrumentu ida ne’ebé bele uza no halo verifikasaun inumerizasaun ho planu estratéjiku tinan 2011 to’o 2030.
Nune’e, tuir rezultadu inumeradór sira ba uma-kain tinan 2022 rejistu totál populasaun hamutuk 1.340.434 , ne’ebé hatudu númeru abitante kontinua aumenta pursentu 1,8% ka aumenta abitante 156.792 ne’ebé ekivalente ho 1,8% kompara ho sensu 2015.
“Ho rezultadu prelimináriu ne’e hatudu katak daudaun ne’e ita nia uma-kain hamutuk 250.34 ho media 5,4% pesoa kada uma kain, entaun media ida ne’e ki’ik kompara ho rezultadu sensu 2015 ne’ebé nia media 5,7% pesoa kada uma-kain”, Governante ne’e esplika.
Iha fatin hanesan, Diretór Jerál Estatístika, Elias do Santos Ferreira, dehan atividade sensu uma-kain 2022 ne’e hetan apoia husi parseiru dezenvolvimentu sira ne’ebé liga liu ba asiténsia teknika nian.
“Parseiru dezenvolvimentu ne’ebé apoia mak UNFPA, UNICEF, WFP, UN WOMEN, ne’e barak liu mak ba asisténsia téknika nian liuliu apoia sasán sira fasilita atividade ida ne’e”, afirma Elias do Santos.
Ministériu Finansa liuhusi Diresaun Jerál Estatístika rekruta ema timór-oan hamutuk rihun 4-resin hodi apoia ba servisu sensu uma-kain 2022 iha territóriu laran tomak.
Entretantu, Reprezentante Fundu Populasaun Nasaun Unida (UNFPA) iha Timor-Leste, Domingas Bernardo, dehan orgullu ba inumerador sira nia servisu ne’ebé hala’o atividade sensu tinan 2022 nian.
“Ha’u hanoin ita hotu tenke orgullu tanba ne’e sensu dijitál dahuluk ba sensu uma-kain ho populasaun nian. Tanba ne’e agradese tebes ba Ministru Finansa no ekipa tomak ba susesu ne’ebé ita hetan. Tanba UNFPA iha komitemntu nafatin hodi fornese servisu sira ne’e atubele finaliza relatóriu, nune’e ita bele lansa iha fulan-abríl tinan 2023”, nia afirma.
Jornalista : Felicidade Ximenes
Editór : Florencio Miranda Ximenes
