DILI,28 dezembru 2022 (TATOLI)- Padre Pároku ba Parókia Nossa Señora Imaculada da Conceição, Katedrál, Díli, Mgr. José António da Costa, hakotu iis iha sala Unidade kuidadu intensivu (ICU), Hospitál Nasionál Guidu Valadares (HNGV) tanba sofre diabetes no tensaun.
Amu José António da Costa hakotu-iis hafoin hala’o tratamentu intensivu iha sala ICU iha loron 28 dezembru, tuku 2:15, madrugada.
Família deside transporta Amu José António da Costa ba HNGV hodi hetan tratamentu sáude iha loron 23 dezembru 2022 tanba durante semana ida la han no hemu hodi afeta ba orgaun isin lolon ladun funsiona di’ak.
Administradór Parókia Nossa Señora Imaculada da Conceição, Katedrál, Díli, Leandro Maria Alves, konfirma katak Amo José António da Costa fila hikasa ba aman Maromak nia kadunan santo.
“Ita nia Amu José António da Costa hakotu ona iis hodi fila hikas ba Aman Maromak nia Kadunan Santo. Mgr. José António da Costa mate ho idade 82 no tempu barak liu serbí Uma-Kreda Timor Leste iha Parókia Nossa Señora Imaculada da Conceição, Katedrál, Díli”, dehan Amu ne’e iha HNGV-Bidau, kuarta ne’e,
Tuir planu Amu Matabian sei funebre iha semitériu Amu-lulik sira nian iha Maloa, munisípiu Dili.
“Ohin, ami hamutuk ho família ko’alia katak atu haloot Amu José António nia mate-isin iha semiteriu nain-lulik sira iha Maloa iha loron 30 dezembru, hafoin ita misa funebre tuku 9:00 dadeer iha katedral Dili”, nia afirma.
Daudaun mate-isin Mgr. José António da Costa iha ona Katedrál, Díli hodi sarani sira ba hato’o sentidu kondolensia ho reza no bele selebrasaun eukaristia nian.
Molok ne’e, Xefe Departamentu ICU HNGV, Vidál de Jesus Lopes, dehan Amo José Antonio da Costa nia kondisaun krítiku tebes tanba sofre diabetes ho tensaun.
“Informasaun ne’ebé espalla iha públiku katak amu mate ne’e la loos tanba ne’e husu ba sarani sira hotu katak amu seidauk mate, maibé kondisaun agora sei kritiku nia laran”,Xefe Departamentu ICU ne’e hateten ba Jornalista sira iha HNGV, tersa ne’e.
”Informasaun ne’ebé mak família sira hato’o katak semana ida ona, Amu la han no hemu tanba família deside lori mai HNGV hodi halo atendimentu, maibé nia nivel konsiénsia hahú menus ona entaun husi ne’e kedas médiku sira halo intervensaun no daudaun ne’e iha ICU signifika apoia ona ventilador hodi halo nia dada iis”, katak nia.
Nia esplika, Amu nia órgaun sira ladun funsiona di’ak tanba sofre diabetes ho tensaun ne’ebé grave tebes.
Jornalista : Felicidade Ximenes
Editór : Florencio Miranda Ximenes
