DILI, 28 dezembru 2022 (TATOLI)–Sekretaria Estadu Juventude no Desportu (SEJD) distribui fundu ba programa estímulu empreendedorizmu ba grupu neen ho montante hamutuk $6.000, iha postu administrativu Uatulari, munisípiu Viqueque.
“Ami horiseik (27 dezembru) distribui fundu estímulu empreendedorizmu ba grupu elijível neen ne’ebé liu avaliasaun grupu, liuhosi proposta ne’ebé submete mai postu administrativu Uatulari,” Koordenadór Unidade Servisu SEJD postu Uatulari, Pedro Pinto da Costa, hateten ba Agência Tatoli, via telefónika, kuarta ne’e.
Responsável ne’e dehan, postu Uatulari iha suku neen maibé suku haat hanesan Babulu, Vesoru, Macadique no Afaloikai mak submete proposta hamutuk hitu, hafoin halo prosesu avaliasaun iha proposta neen mak pasa, ida la pasa, enkuantu suku Matahoi no Uaitame la submete proposta.
Notísia relevante: SEJD sei kria formasaun emprendedorizmu ba joven
Programa ba fundu ne’e ba grupu joven sira hodi hakiak animál hanesan ikan, fahi no bibi, ne’ebé sei distribui ba grupu sira iha postu no Unidade Servisu SEJD postu administrativu Uatulari maka sei halo kontrolu ba implentasaun atividade grupu.
Kada grupu hetan orsamentu $1.000 hodi apoiu grupu sira-nia atividade tuir proposta.
“Ami garante fundu estimulu empreendedorizmu ba tinan ida-ne’e sei susesu,” nia akresenta.
Grupu sira ne’ebé hetan fundu maka AMOR hosi suku Macadique hala’o atividade hakiak ikan, grupu Espíritu Foin-sa’e hosi suku Mecadique hala’o atividade hakiak fahi, grupu Fahi Matak hosi suku Vesoru hala’o atividade hakiak fahi, grupu Abagia hosi suku Afaloikai hala’o atividade hakiak fahi, grupu Hadi’a Vida ba Futuru hosi suku Babulo hala’o atividade hakiak bibi no grupu Sosi Kbiit hosi suku Babulu hala’o atividade hakiak bibi.
Hafoin simu fundu, grupu benefisiáriu fundu sei implementa programa iha janeiru 2023.
Fundu ne’e distribui hosi Administradór postu administrative Uatulari, Manuel do Rosário, iha salaun administrasaun Uatulari.
Jornalista : Vitorino Lopes da Costa
Editora : Julia Chatarina
