DILI, 28 dezembru 2022 (TATOLI)– Ministru Obra Públika (MOP), Abel Pires da Silva informa, daudaun ne’e kompañia Jonize Unip.Lda fui ona alkatraun ba estrada diresaun hosi Kasnafar no Sarlala, nune’e tinan oin bele finaliza reabilitasaun.
“Kasnafar agora ponte iha ona tenderizasaun, kona-ba fui alkatraun agora la’o hela, nune’e tinan oin bele ramata ona. Maibé iha parte haat ida mak ita susar atu book tanba rai monu maka’as ita sei husik hela seidauk bele tau lai alkatraun”, dehan Ministru ne’e iha Dili, kuarta ne’e.
Orsamentu ba fui alkatraun la to’o millaun $5 no orsamentu hirak ne’e mai hosi fundu infraestrutura.
Antes ne’e, Ministru Abel Pires da Silva, akompaña husi Diretór Nasionál Estrada, Ponte no Kontrollu i Seias (DNEPCC, sígla Portugués), Milton Ramanata de Castro Monteiro, halo inspesaun ba progresu servisu husi kompaña konstrutór Jonize Unip. Lda, ne’ebé daudauk ne’e nahe ona aspalt ba projetu estrada foun husi Fatisi Bee Tudak nian to’o Sarlala diresaun husi Dili ba Aileu nian.
Iha inpesaun ne’e, Ministru kontinua orienta atu kompañia konstrutór kontinua nahe aspalt tuir kontratu ne’ebé iha no tenke garante mós nia kualidade.
Prosesu nahe alkatraun ne’e sei tarde oituan tanba daudauk ne’e tempu udan, tanba ne’e kompañia halo servisu nahe aspalt iha tempu dader de’it, iha parte loraik kontinua ho servisu seluk, maske nune’e kompañia sei halo esforsu hodi finaliza projetu estrada refere ho nahe aspalt.
MOP agradese ba esforsu tomak kompañia nian ne’ebé daudauk ne’e hahú ona nahe Alkatraun no espera katak bele finaliza ho di’ak no ho kualidade, atu nune’e komunidade bele uza ba tempu naruk.
Antes halo inspesaun ba estrada Fatisis Bee Tudak to’o Sarlala, Ministru halo mós observasaun ba servisu kompañia sira nian ba normalizasaun estrada husi Manleuanna to’o mota Kasnafar ne’ebé hetan estragus husi kalamidade 04 Abril 2021, ne’ebé antes Sr. Ministru asina ona nia kontratu ho kompañia sira hodi halo normalizasaun.
Kompañia sira daudaun ne’e hahú mobiliza ona nia ekipamentu pezadu ba tereñu no hahú halo ona servisu normalizasaun ba estrada diresaun Manleuanna to’o mota Kasnafar.
Projetu rehabilitasaun husi Manleuanna to’o Kasnafar kuaze Kilometru ida resin ho totál orsamentu millaun $5.5 ne’ebé ezekuta husi kompañia tolu no estrada Fatisi to’o Sarlala kuaze kilométru 8 ho nia orsamentu tau aspalt hamutuk la to’o millaun $5. Orsamentu hirak ne’e KAFI deside ona tama iha Fundu Infraestrutura.
Reabilita estrada Rotunda to’o Raikotu ho osan millaun $1,2
Alende ne’e, Ministru Obra Públiku (MOP), informa konstrusaun estrada diresaun Rotunda Prezidente Nicolau Lobato to’o Raikotu sei gasta osan hamutuk millaun $1,2.
“Estrada ligasaun hosi Rikotu mai Rotunda Comoro ne’e ita halo neneik no la urjente. Ita sei gasta osan hamutuk millaun $1,2. Fundu ne’e mai hosi opsaun rua mak bele hosi Fundu Infraestrutura no hosi emprestimu ne’ebé Ministériu Finansa resposabiliza”, katak Governante ne’e.
Kona-ba, indemnizasaun ba eskola São Miguel iha hela prosesu laran hodi prepara fatin seluk atu harii fali eskola foun, nune’e bele livre ba kompañia sira hodi ezekuta servisu.
“Prosesu hotu daudaun ne’e iha hela Ministériu Justisa (MJ) mak sei deside fatin seluk atu konstrui eskola foun”,katak.
Daudaun ne’e, Governante ne’e dehan seidauk loke konkursu públiku atu kompañia sira bele konkore.
Antes ne’e, Iha dalan ninin ligasaun Rotunda Nicolau Lobato to’o Raikotu hosi Estrada kraik komunidade hamutuk uma-ka’in 260 mak Governu liuhosi MOP fó ona kompesasaun no hamamuk ona fatin.
Alende ne’e, Estrada ligasaun Tasi-Tolu to’o Raikotu sei finaliza iha semana hira tan no bele to’o janeiru tinan-oin. Projetu ne’e ka’er hosi kompañia nasionál Jonize Unip.Lda, kuaze metru 680 hosi Tasi-Tolu to’o Rai-kotu.
Jornalista: Hortencio Sanchez
Editór : Florencio Miranda Ximenes
