BAUCAU, 29 dezembru 2022 (TATOLI) – Komunidade hetan bebé ida, ema soe iha área Iasura , suku Sagadati, postu administrativu Laga, munisípiu Baucau.
Xefe suku Sagadati, Aureliano de Jesus, informa, komunidade hetan bebé seksu feto, iha loron kuarta, 28 dezembru purvolta oras 11:00 resin iha aldeia Iasura bainhira atu ba ka’it no lalin kulu.
“Ita deskonfia bebé moris soe kedas tanba kondisaun bebé nia husar seidauk tesi,” Xefi suku Sagadati haktuir liuhosi telefónika, kuarta ne’e.
Hafoin simu informasaun hosi komunidade, xefe suku direitamente orienta membru konsellu suku inklui Ofisiál Polísia Suku (OPS) to’o iha fatin akontesementu hodi halo investigasaun.
Inklui, kontinua tama-sai uma hodi identifika no konsege deteta pesóal ka inan ne’ebé suspeitadu soe bebé, enkuantu bebé refere kondisaun di’ak no kontinua kedas transfere ba sentru saúde hodi halo tratamentu.
“Tenki investiga didi’ak mane ne’ebé mak fó oan tanba suku Sagadati akontese ba dalarua ona, ami fó hatene antes ona ba komunidade kona-ba prevensaun,”Autoridade lokál ne’e akresenta.
Autoridade suku Sagadati komprometidu atu kontinua halo prevensaun kona-ba kazu soe bebé hanesan fahe informasaun no bainhira kontinua akontese prosesu tenki prosesa tuir dalan legál.
Entretantu, hafoin hetan tratamentu iha sentru saúde Sagadati bebe refere direitamente transporta ba uma-mohon munisípiu Baucau no parte Autoridade suku kontinua prosesa pesóal ne’ebé soe bebé ba Eskuadra Polísia Nasionál Timor-Leste (PNTL) postu administrativu Laga.
Jornalista : Natalino Belo
Editór : Rafael Ximenes de A. B.
