DILI, 29 dezembru 2022 (TATOLI)–Diretora Programa Nasionál Dezenvolvimentu Suku (PNDS), Claudinha Soares Pinto, hateten Uma Kbiit Laek (UKL) tinan 2021 ne’e hela 2% mak seidauk konklui konstrusaun fíziku.
“Konstrusaun UKL 2021 nian iha territóriu nasionál ita hela de’it ona 2% mak seidauk konklui tanba dalan no mudansa klimatika ho udan hela de’it. Maibé hosi ne’e maiória mak halo ona lansamentu no ekipa entrega ona ba na’in hodi hela bá,” nia dehan ba Agência Tatoli, iha salaun Mahoka, Dili, kinta ne’e.
Nia dehan, hosi 2% ne’e mak suku ne’ebé sai obstakulu ba dalan mak hanesan Fatuk-Makerek iha Laclubar, Manatuto nian, Soba iha Laga inklui Wairoke-Lautém ne’ebé ekipa kontinua halo hela konstrusaun uma.
Hosi 2% ne’e signifika uma ne’ebé seidauk konklui hamutuk 25, maibé nia dehan ekipa kontinua esforsu ho másimu nune’e bele konklui lalais.
“Mesmu ita-nia iklima ladi’ak udan loron-loron hela de’it maibé ita nafatin esforsu atu bele konklui no entrega ba nia na’in,” nia dehan.
Ministru Administrasaun Estatál (MAE), Miguel Pereira de Carvalho, hateten iha tinan fiskál 2021 MAE liuhosi PNDS konstrui UKL hamutuk 1.254, ne’ebé nia progresu iha munisípiu hotu la’o di’ak no hetan apresiasaun boot hosi komunidade rasik hetan benefísiu direta.
Tan ne’e, iha tinan 2022, Governu liuhosi Ministéiru Finansa aloka orsamentu besik millaun $8 atu kontinua programa refere maibé ida-ne’e la to’o atu hala’o iha suku hotu hotu tanba redusaun 75% hosi orsamentu ne’ebé aloka iha tinan ida-ne’e.
“Deputadu sira propoin tan osan hamutuk $63,600.000 hodi MAE liuhosi PNDS bele implementa Uma Kbiit Laek iha 2022, aumenta uma 10 kada suku nune’e programa ida Governu prontu atu implementa ne’e,” nia dehan.
Jornalista : Osória Marques
Editór : Cancio Ximenes
