Dom Virgilio Kardeál hato’o sentidu kondolénsia ba Papa Bento XVI nia mate

DILI, 31 dezembru 2023 (TATOLI)—Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, lori igreja lokál Timor-Leste nia naran hato’o sentidu kondolénsia ba Papa Bento XVI ne’ebé mate iha vatikanu ho idade 95.
Notísia Relevante: Vatikanu husu sarani Katólika reza ba Papa Bento XVI
“Liuhosi reprezentante Santa Sé iha Timor-Leste, ha’u lori igreja lokál Timor-Leste nia naran hato’o sentidu kondolénsia ba Papa Emeritu Bento XVI nia mate iha Vatikanu,” Dom Virgílio Kardeál do Carmo da Silva, SDB, hateten iha entrada selebrasan eukaristia ba tinan foun troka tinan tuan iha Katedral, Dili, sábadu ne’e.
Papa Emeritu Bento XVI mate ho idade 95 iha sábadu (31 dezembru 2022) dadeer, iha ninia rezidénsia iha kongeragasaun Mater Ecclesiae hafoin enfrenta moras grave.
“Ho laran triste, ami fó hatene ba sarani sira katak Papa Emeritu Bento XVI mate iha loron ohin iha tuku 09h34 iha kongregasaun Biara Mater Ecclesiae iha Vatikanu,” refere komunikadu imprensa hosi mídia Santa Sé ne’ebé Agência Tatoli asesu, sábadu ne’e.
Hahú iha segunda (02 janeiru 2023), mate-isin Papa Emeritu Bento XVI sei hatuur iha Basilika Santo Petrus Vatikanu.
Antes ne’e, Papa Francisco abertamente fahe liafoun kona-ba Papa Bento XVI ne’ebé hetan moras grave, bainhira hala’o ninia audiénsia dala ikus nian iha 28 dezembru 2022.
Ho nune’e, Papa Francisco konvida sarani sira iha mundu tomak atu reza ba Papa Emeritu Bento XVI ne’ebé moras todan, nune’e Maromak bele fó bensaun ba ninia testemuña domin ba uma kreda rohan laek.
Iha biban tuir mai, Vatikanu sei fó sai oráriu ba serimónia funeral nian.
Papa Bento XVI mak naran Papa nian maibé naran loloos ne’e Joseph Alois Ratzinger no moris iha 16 abril 1927.
Nia sai hanesan servidór ba 265 hanesan Papa ba Igreja Katólika Romana iha 19 abril 2005 to’o hato’o nia rezignasaun iha 28 fevereiru 2013.
Papa Emeritu Bento XVI lidera Igreja Katolika Roma durante maizumenus tinan ualu (8) to’o tinan 2013 no nia hanesan Papa dahuluk ne’ebé rezigna-an dezde Papa Gregorius XII iha tinan 1415.
Jornalista : Cidalia Fátima
Editór : Cancio Ximenes

