Komunidade Bobokase husu autoridade RAEOA buka solusaun ba inundasaun
OÉ-CUSSE, 31 dezembru 2022 (TATOLI)–Xefe suku Bobokase, sub-rejiaun Pante Makasar, Sebastião Cob, reprezenta komunidade afetadu inundasaun iha bairru Nusla’o, aldeia Bihala rekomenda no husu ba Autoridade RAEOA iha futuru bele buka ona solusaun ba problema ne’ebé akontese inundasaun kada tinan iha bairru refere.
“Inundasaun akontese iha sesta (30/12), ne’e tanba udan boot maibé ha’u husu ba Autoridade RAEOA bele hadi’a, tanba kuandu atu impede bee labele tama ba komunidade nia uma, bele taka netik kuak ne’ebé loke hela iha gabiaun foun ne’e. Tanba kuak ne’e mak konvida bee tama makaas liu, ne’e mak bee tama ba komunidade nia uma hodi estraga sira-nia sasán uma laran,” Xefe suku Bobokase, Sebatião Cob, informa ba Agência Tatoli iha sede suku Bobokase, sábadu ne’e.
Nune’e nu’udar autoridade komunitáriu reprezenta komunidade aldeia Bihala liu-liu bairru Nusla’o, rekomenda ba Autoridade RAEOA atu kontinua aumenta gabiaun aas uitoan, nune’e bele hamenus netik volume bee tama ba komunidade nia uma, tanba bainhira taka ona kuak ne’e no mós aumenta gabiaun sae tán, bsei laiha tan ona problema iha futuru.
“Tanba, fatin inundasaun ne’e la’ós tanba barajen Tono maibé fatin ida-ne’e iha ha’u-nia suku laran, desde uluk bee sempre tama. Maibé komu agora ita barak ona, komunidade hela metin iha fatin ne’e, entaun ha’u husu ba Autoridade bele ajuda hodi hadi’a tan gabiaun ne’e,” nia husu.
Komunidade afetadu ba inundasaun iha bairru Nusla’o, Leonardo da Costa, haktuir komunidade sira iha bairru Nusla’o hela nanis ona dezde Indonézia nia tempu no laiha akontesimentu kona-ba inundasaun,
Hafoin barajen Tono hamrik liu tinan rua de’it komesa akontese inundasaun desde 2020 to’o ohin loron.
“Ne’ebé tuir ami-nia haree karik Governu iha hanoin atu ajuda ami, persiza fera netik barajen Tono kuak ida tan iha klaran, nune’e bainhira kuandu tempu udan mota sa’e, ita bele loke, bee bele lori sai tiha rai henek no rai tahu iha barajen laran. Maibé se la fera entaun kada tinan ami komunidade sei sai vitítma nafatin,” nia husu
Durante akontese inundasaun komunidade tenke husik hela fatin ba hela hamutuk ho família seluk, la’ós ne’e de’it maibé lakon mós ho sasán hanesan animál, roupa no toos natar inklui estraga mós estrada públiku.
“Guvernu liuhosi Autoridade tinan kotuk mai identifika ona komunidade afetadu inundasaun, maibé to’o agora família ida mak hetan ona uma, ami sira-seluk seidauk. Maibé ami la ezije, ami husu de’it sei bele buka solusaun ba ami liu-liu barajen ne’e de’it,” nia hateten.
Entretantu, tuir dadús provizóriu ne’ebé Agência Tatoli asesu liuhosi Gabinete Prezidente Autoridade RAEOA hamutuk uma kain 33 mak sai afetadu iha Oé-Cusse ne’ebé akontese inundasaun iha loron 30 dezembru 2022.
Hosi dadús ne’e uma-kain 11 iha bairru Nusla’o, aldeia Bihala, aldeia Oé-Baha, suku Bobometo uma kain ualu (8), suku Costa bairru Samoro uma kain rua (2), Nunuheno suku Cunha uma kain 10, bairru Mahata suku Costa uma kain ida (1) no suku Naimeko iha bairru Kuafeu uma kain ida (1).
Jornalista : Abílio Elo Nini
Editór : Cancio Ximenes
