PR Horta-PR Marcelo Rebelo to’o ona iha Brazíl

DILI, 31 dezembru 2022 (TATOLI)—Prezidente Repúblika (PR), José Ramos Horta, ho delegasaun iha sesta (30/12/2022) ne’e iha tuku 16h25 oras Brazíl to’o iha aeroportu Brasilia ho aviaun TAP Portugál, hamutuk ho ninia omólogu Marcelo Rebelo de Sousa hosi Portugál no José Maria Neves hosi Cabo Verde.
Notísia Relevante: PR Horta-PR Marcelo Rebelo hala’o viajen hamutuk ba Brazíl
Tuir komunikadu imprensa ne’ebé Agéncia TATOLI asesu sábadu ne’e haktuir, delegasaun Xefe Estadu sira mós akompaña hosi Sekretariu Ezekutivu CPLP, Zacarias Albano da Costa.
To’o iha aeroportu Brasilia, delegasaun Xefe Estadu José Ramos Horta simu hosi Embaixadór Timor-Leste ba Brazíl, Olimpio Miranda Branco no Adidu Edukasaun Edmiro Augusto Soares da Cunha no hetan akompañamentu Polísia Rodoviária Federal (PRF) hodi ba deskansa iha ótel Royal Tulip.
Xefe Estadu mós sei partisipa iha konfraternizasaun ne’ebé organiza hosi Laboratóriu ba Estudu Ekonomia no Globalizasaun hosi Universidade de Brasilia no Embaixada Timor-Leste iha Brazíl.
Xefe Estadu Ramos Horta no Prezidente hosi Alemaña, Angola, Argentina, Bolívia, Cabo Verde, Chile, Colômbia, Equador, Guiana, Guiné Bissau, Paraguai, Portugál, Suriname, Uruguai, Zimbábue no Liurai España sei sai sasin ba investidura Prezidente Repúblika Federativa Brazíl, Luís Inácio Lula da Silva iha loron 01 fulan-janeiru tinan 2023 iha Palásiu Planalto, Brasilia.
Hafoin serimónia investidura, Prezidente Repúblika sei halo enkontru ho Prezidente Luís Inácio Lula da Silva iha Palásiu Itamaraty, atende mós enkontru ho amigu Prezidente Ramos-Horta, delegasaun ida husi Ukránia no entidade importante balun.
Jornalista : Nelson de Sousa
Editór : Cancio Ximenes

