COVALIMA, 03 janeiru 2023 (TATOLI)–Governu liuhosi Sekretáriu Estadu Juventude no Desportu (SEJD) apoiu fundu $1000 ba grupu Roman Taroman (Romanta) iha suku Taroman, postu administrativu Fatululik, munisípiu Covalima, atu kuda modo.
“Sekretáriu Estadu Juventude no Desportu (SEJD) apoiu fundu $1000 ba ami-nia grupu atu fasilita ami-nia grupu iha área hortikultura ne’ebé foku atu kuda modo iha postu administrativu Fatululik,” Xefe Gropu Roma taroman (Romanta), Julio Cardoso, informa ba Agência Tatoli iha suku Taroman, tersa ne’e.
Governu liuhosi sekretáriu Estadu Juventude no Desportu fó apoiu fundu $1000 ne’e, ho objetivu atu fasilita grupu sira hodi sosa ekipamentu hortikultura nian.
“Governu apoiu orsamentu ne’e atu fasilita grupu hodi sosa ekipamentu hortikultura ne’ebé daudaun ne’e ami kuda modo iha kanteiru tolu,” nia dehan.
Governu apoiu fundu ne’e, transfere direta ba konta bankaria finansa postu administrativu Fatululik, hafoin entrega ba grupu Roman Taroman (Romanta) iha loron 27 fulan-dezembru tinan 2022.
Grupu Roman Taroman (Romanta) estabelese foin fulan rua ne’ebé hahú estabelese iha fulan-novembru tinan 2022, ho nia membru na’in-10 ne’ebé kompostu hosi feto na’in-neen (6) no mane na’in-haat (4).
Jornalista : Celestina Teles
Editór : Cancio Ximenes
