DILI, 03 janeiru 2023 (TATOLI)—Prezidente Repúblika (PR), José Ramos Horta, ho nia omólogu Prezidente Angola, João Lourenço, segunda ne’e (02/01/2023), hasoru malu iha Hotel Royal Tulip Brazília.
Iha sorumutu ne’e, parte rua ko’alia liu kona-ba kooperasaun bilaterál entre nasaun Timor-Leste no Angola no oportunidade atu halo investimentu iha ASEAN inklui loke Embaixada Angola iha Dili.
“Ministru Negósiu Estranjeiru Angola sei mai vizita Timor iha tempu badak no Prezidente Angola mós hakarak vizita, tanba nunka Prezidente Angola ida mai Timor-Leste no sira sei haree loke embaixada ida iha Timor-Leste,” Prezidente Republika José Ramos Horta, haktuir liuhosi komunikadu imprensa ne’ebé Agência TATOLI asesu, tersa ne’e.
Tuir Xefe Estadu, Angola hanesan produtór petróleu ho kuantidade barril millaun rua kada loron, produtór diamante, osan-mean, karvaun no seluk tan no empreza angolana balun mós investe ona iha Xina no sai proprietária ba rezidénsia andar 20 to’o 30 iha Singapura.
Kona-ba ASEAN, Xefe Estadu dehan, adezaun Timor-Leste ba ASEAN, sei sai hanesan plataforma investimentu ba nasaun membru Comunidade Paises Lingua Portuguesa (CPLP) sira.
“Timor-Leste iha tempu badak, 2023, 2024, 2025, bele tama iha ASEAN, bele sai hanesan plataforma ida, para rai sira hanesan Angola, Portugál, Brazíl, bele halo investimentu hodi koloka sira-nia produtu iha Timor-Leste. Rai sira-ne’e iha meiu indústria, bele uza Timor-Leste hanesan plataforma, hodi halo reesportasaun ba nasaun sira iha ASEAN,” Xefe Estadu hateten
Timor-Leste bele sai hanesan armajén ba transaksaun produtu hanesan modelu komérsiu ne’ebé Singapura opta hodi akomoda produtu importadu hosi nasaun seluk.
“Brazil ha’u husu ba sira loke fábrika medikamentu, Portugál loke fábrika medikamentu, indústria modas, roupa, tanba Portugál ein-termu indústria moda nian, boot tebe-tebes iha mundu, halo sapatu ho kualidade. Agora Portugál númeru daruak, hafoin Itália no Timor-Leste bele sai hanesan armajén ba produtu sira-ne’e hotu, hodi faan fila-fali ba nasaun seluk,” nia hateten.
Tuir Ramos Horta, enkontru ho líder no entidade importante sira iha eventu internasionál sira hanesan parte integrante iha diplomásia no Timor-Leste tenke ativu liután.
“Ha’u hasoru malu mós ho Vise Ministru Edukasaun Singapura, foin lalais hasoru malu iha Singapura, nia mai Timor-Leste, hasoru malu mós ho delegasaun hosi Kambodia, hasoru ho vise Prezidente Cuba mós mai no delegasaun lubuk ida,” Xefe Estadu dehan.
Jornalista : Nelson de Sousa
Editór : Cancio Ximenes
