EDUKASAUN, HEADLINE

Estudante 1.589 hosi Baucau sai mellór klasifikadu

Estudante 1.589 hosi Baucau sai mellór klasifikadu

Diretór Servisu Edukasaun Munisípiu Baucau, Augusto Ornai Ximenes. Imajen Tatoli/Natalino Belo

DILI, 04 janeiru 2023 (TATOLI)—Diresaun Servisu Edukasaun Munisípiu Baucau (DSEMB) identifika ona estudante hamutuk 1.589 mak tama kategoria mellór klasifikadu atu hetan bolsa méritu hosi Ministériu Edukasaun Juventude no Desportu (MEJD).

“Estudante identifikadu 1.589 atu hetan bolsa méritu mai hosi eskola Baucau laran hamutuk 363, hosi eskola ensinu báziku ensinu sekundáriu jerál no tékniku vokasionál. Ita halo ona identifikasaun no klasifikasaun ba estudante 1.589, kompostu hosi estudante pasajen klase ensinu báziku primeiru siklu hamutuk 650, segundu siklu 655, depois hosi 110 ano ba 120 ano iha 70 inklui ensinu sekundáriu tékniku vokasionál 25,” Diretór Servisu Edukasaun Munisípiu Baucau, Augusto Ornai Ximenes, informa ba Agência Tatoli, via telefónika, kuarta ne’e.

Notísia relevante: Estudante mellór klasifikadu 635 iha Aileu tama lista bolsa méritu

Aleinde ne’e, estudante finalista sura hosi ensinu báziku terseiru siklu ba 90 ano hamutuk 132, ensinu sekundáriu jerál iha 42 no ensinu sekundáriu tékniku vokasionál iha 15, ho nune’e totál estudante finalista ne’ebé tama iha mellór klasifikadu ne’e hamutuk 189.

“Maski sira iha ona dadus estudante finalista 189 ne’ebé identifikadu sai mellór klasifikadu, maibé sira sei hein hela parte nasionál atu submete dadus estudante finalista sira nian atu nune’e parte munisipál bele apár ho dadus ne’ebé sira prepara ona,” nia akresenta.

Estudante mellór klasifikadu 1.589 ne’ebé sei hetan bolsa méritu ne’e sei hetan prémiu tuir klasifikasaun.

Primeiru klasifikadu sei hetan $600, segundu klasifikadu $550, terseiru klasifikadu $500, kuartu klasifikadu $450 no kintu klasifikadu $400. Enkuantu totál orsamentu ne’ebé MEJD prevee ona ba programa bolsa méritu ne’e hamutuk millaun $7,2 ba estudante identifikadu sai melloór klasifikadu iha territóriu laran tomak.

Jornalista   : Tomé Amado

Editora        : Julia Chatarina   

iklan
iklan

Leave a Reply

iklan
error: Content is protected !!