Uma kain 55 iha Belecasak deside la simu subsídiu $200
COVALIMA, 04 janeiru 2023 (TATOLI)–Xefe suku Belecasak, postu administrativu Maucatar, munisípiu Covalima, Leonito Gusmão, informa benefisiáriu subsídiu fim do ano hamutuk uma kain 55 iha suku Belecasak deside la simu subsídiu $200.
Notísia Relevante: Pagamentu subsídiu $200 hela Dili-RAEOA mak seidauk finaliza
“Pagamentu subsídiu $200 finaliza ona maibé uma kain 55 iha suku Belecasak deside la simu tanba balun sira-nia saláriu mensál liu $ 500 no balun sira-nia naran dobru,” Autoridade lokál, Leonito Gusmão, informa ba jornalista sira iha Tabakolot, kuarta ne’e.
Razaun uma kain 55 deside la simu subsídiu $200 ne’e la’ós tanba problema osan maibé balun sira-nia saláriu mensál liu $500 no balun sira-nia naran dobru entaun uma-kain 55 deside la simu subsídiu $200.
Bazea ba dekretu-lei númeru 37/2022, iha artigu 2 hateten katak família ne’ebé sai benefísiariu ne’e ninia membru ida-nia rendimentu ida mak liu ona $500 ne’e labele simu subsídiu fim do ano $200 ba uma kain.
Iha suku Belecasak, postu administrativu Maucatar ne’e totál uma kain hamutuk 820 no hosi númeru ne’e, uma-kain 765 mak simu ona subsídiu $200 no uma kain 55 mak deside la simu subsídiu $200.
Ho nune’e, ekipa pagamentu hosi ministériu solidariedade Sosial no Inkluzasaun devolve osan $11.000 ba kofre Estadu.
Ekipa pagamentu hos Ministériu Solidariedade Sosiál no Inkluzaun (MSSI) hala’o pagamentu iha suku Belecasak durante semana ida-nia laran, ne’ebé akompaña hosi xefe suku ho pesoál Apoiu Administrasaun Suku (PAAS), ekipa MSSI, ofisiál finansa no Ofisiál Polísia Suku (OPS).
Jornalista : Celestina Teles
Editór : Cancio Ximenes
