VIQUEQUE, 04 janeiru 2023 (TATOLI)–Unidade Servisu Postu Administrativu Uatucarbau (USPA), munisípiu Viqueque, hosi Sekretaria Estadu Juventude no Desportu (SEJD) husu grupu juventude kreativu 12 ne’ebé sai benefisiáriu ba fundu estímulu empreendedorizmu, atu uza ho di’ak ba atividade sira.
“Ami enkoraja grupu joventude ne’ebé sai benefisiáriu programa atu uza fundu ho di’ak ba atividade grupu ida-idak iha postu Uatucarbau,” USPA-SEJD Uatucarbau, David da Silva Xavier, hateten ba Agência Tatoli, via telefónika, kuarta ne’e.
Fundu iha postu Uatucarbau destina ba suku neen hanesan Afaloikai, Bahatata, Irabin de Baixo, Irabin de Cima, Loi Ulo no Uani Uma.
Notísia relevante: Sentru Juventude Viqueque apoia fundu estímulu empreendedorizmu ba benefisiáriu 29
Antes ne’e, grupu juventude kreativu sira hosi suku lima (la inklui suku Irabin de Cima) submete proposta hamutuk 12 ba postu Uatucarbau, ne’ebé ekipa avaliasaun proposta avalia no hetan rezultadu grupu ualu maka elejível, enkuantu grupu haat seluk la liu prosesu.
Tinan ida-ne’e fundu ba programa hosi SEJD ba postu Uatucarbau ho montante $6.000.
“Ami distribui fundu iha loron 29 dezembru 2022 ba grupu 12 ne’ebé liu iha prosesu avaliasaun, ne’ebé kada grupu hetan $750 hodi implementa atividade tuir proposta ne’ebé submete ona ba postu. Iha prosesu implementasaun, ami hamutuk ho Autoridade postu Uatucarbau no SEJD nasionál maka sei halo kontrolu ba atividade empreendedorizmu,” nia tenik.
Ho fundu ne’ebé hetan, grupu 12 sei realiza atividade hakiak animál hanesan fahi, bibi, ikan, loke ofisina, prodús mina-nuu no seluk tan, ne’ebé sei implementa iha janeiru 2023.
“Ami fiar hosi fundu ne’e grupu elejível sei hetan susesu tanba molok ami distribui fundu, ami akompaña direta atividade empreendedorizmu ne’ebé joven kreativu sira realiza,” David da Silva dehan.
Jornalista : Vitorino Lopes da Costa
Editora : Julia Chatarina
