DILI, 05 janeiru 2023 (TATOLI)—Ministériu Transporte no Komunikasaun (MTK) liuhosi Diresaun Nasionál Transporte no Terrestre (DNTT) sei distribui xapa matríkula orijinál ba karreta no motór, fulan ne’e.
Xefe Departamentu Rejistu Veíkulu DNTT, Amándio do Rosário, informa, empreza Auto Zone submete ona xapa matríkula orijinál iha loron 26 dezembru 2022, maibé tanba logo DNTT seidauk iha, maka empreza hadi’a fali.
“Horiseik ha’u komunika ona ho empreza na’in sira hodi hadi’a, nune’e iha loron 15 janeiru agora sira sei lori entrega ba DNTT liuhosi Diresaun Aprovizionamentu, ne’ebé iha fulan ida-ne’e nia-laran ita sei distribui ba abitante sira ne’ebé durante ne’e hein hela sira-nia xapa matríkula orijinál,” Amándio do Rosário, informa ba Agência Tatoli iha ninia knaar fatin, DNTT, Balide, kinta ne’e.
Notísia relevante: Empreza Auto Zone submete ona xápa matrikula orijinál ba DNTT
Xapa matríkula orijinál ne’ebé daudaun empreza halo ba karreta hamutuk hamutuk 7.000 no motór 36.000.
Ba xapa matríkula karreta privadu hahú hosi A.24-000 to’o A.28-999 TL no ba xapa matríkula orijinál motór hahú P.6001 to’o T-1610 TL.
“Abitante sira durante ne’e preokupa no ezije xapa matríkula orijinál tanba tinan barak ona mak sira la’o ho surat tahan no validade de’it, maibé agradese tanba ekipamentu sira ne’e to’o mai DNTT. Espera bele responde sira-nia preokupasaun,” nia akresenta.
Karreta ne’ebé mak rejistu iha DNTT hahú hosi tinan 2001 to’o novembru 2022 hamutuk 56.095 no motór hamutuk 190.805, nune’e transporte rejistadu hamutuk 246.900.
Jornalista : Arminda Fonseca
Editora : Julia Chatarina
