DÍLI,05 janeiru 2023 (TATOLI) – Diretora Servisu Saúde Munisípiu Díli, Agostinha Segurado, hateten limpeza jerál mak sai prioridade iha família hodi halo prevensaun ba moras dengue.
“Limpeza jerál sai prioridade ba família hodi kuidadu ambiente sira tanba dengue mosu barak bainhira ita laiha limpeza, so´e foer arbiru, bee nalihun, ida ne’e mak halo susuk sai barak liután hodi afeta ba moras dengue”, Agostinha Segurado, informa ba jornalista sira, ohin.
Nia husu ba ema hotu ho konsiénsia hodi hamos uma-laran, atu nune’e bele halo prevesaun sedu ba moras dengue hodi labele afeta ba labarik sira.
“Tanba iha tinan 2022 Servisu Saúde Munisípiu Díli rejista kazu dengue hamutuk 3.900-resin no mate 34, entaun ida ne’e númeru ne’ebé makas kompara ho tinan uluk nian”, rekorda.
Agostinha akresenta iha 2022 kazu ne’ebé sae makas mak iha janeiru, fevereiru, marsu, abril maio, maibé iha novembru maske udan maibé kazu ladún barak.
“Entaun ita mós fó atensaun duni ba prevensaun ne’ebé mak iha hodi halo iha terenu maske lamentasaun balun husi autoridade sira katak presiza duni kímiku no fomigasaum. Mai ha’u fó mensajen ba ita hotu katak labele depedente ba kímiku maibé limpeza mak prioridade ba kada uma-kain sira atu halo prevensaun.
Jornalista : Felicidade Ximenes
Editór : Zezito Silva
