BOBONARO, 05 janeiru 2023 (TATOLI)-Diresaun Terra no Propriedade (DTP) munisípiu Bobonaro rekolla reseita hamutuk rihun $72-resin ba kofre estádu durante tinan 2022.
Diretór Servisu Terra, Propriedade no Servisu Kadestrál iha munisípiu Bobonaro, Castro Lacu Martins, esplika reseita hirak-ne’e rekolla hosi taxa arrendamentu rai no uma estadu sira-ne’ebé okupante lokál no estranjeiru sira utiliza ba atividade negósiu no rezidénsia.
“Ita iha arrendatáriu hosi inísiu to’o mai agora iha 94 de’it, maibé sira-ne’ebé uza ba rezidénsia iha 23 mak la selu, ne’ebé ita konsege iha tinnn 2022 liubá ne’e hatama reseita liuhosi rai no uma estadu ne’e $72 mil resin,” nia informa jornalista sira iha Maliana, kuarta ne’e.
Maske diresaun ne’e rekolla reseita ba kofre estadu maibé sei enfrenta hela problema no difikuldade kona-bá transporte operasionál, tanba karreta ida-ne’ebé governu anteriór entrega iha tinan 2009 daudaun ne’e avaria no seidauk halo manutensaun.
Tamba ne’e difikulta funsionáriu sira halo serbisu iha baze, hodi atende kazu disputa rai, rekolla dadus uma no rai estadu sira inklui responde ba nesesidade sira seluk no ba partisipa enkontru iha nasionál.
“Durante halo serbisu, ha’u hanesan diretór hasai ha’u-nia osan rasik enxe mina ba karreta hodi halo serbisu,” nia katak.
Nune’e mós enfrenta problema seluk kona-bá mobiliáriu hanesan meza no kadeira, inklui ekipamentu eletrónika hanesan kamputadór no mákina printer avaria ona, labele halo foto kópia ba dokumentu importante sira.
“Ha’u halo ona pedidu ba diretór jerál, maibé até agora pedidu seidauk responde, ne’ebé ami-nia serbisu administrasaun durante ne’e mós la’o ladún di’ak ida,” nia katak.
Hatán ba preokupasaun ne’e, Ministru Justisa, Tiago Amaral Sarmento, orienta ona Diretór Jerál anota atu konsidera problema sira ne’e iha tempu tuir mai.
Maski nune’e, Governante ne’e mós hato’o parabéns ba funsionáriu DTP Bobonaro tanba halo ona susesu boot hatama reseita 72-resin ba kofre estadu.
“Ha’u agardesu imi-nia esforsu no sakrifísiu tomak durante tinan 2022, espera katak iha 2023 imi sei la dezanima, kontinua nafatin kbiit no esforsu tomak sira-ne’e,” Ministru Tiago enkoraja.
Notísia relevante: MJ orienta DTP Bobonaro identifika rai no uma Estadu
Jornalista: Sérgio da Cruz
Editór: Evaristo Soares Martins
