DILI, 05 janeiru 2023 (TATOLI)–Udan no anin ho intensidade maka’as ne’ebé akontese iha munisípiu Ermera, iha loron ikus ne’e konsege sobu edifísiu Eskola Edukasaun Pré-Eskolár ida iha Holorema sentru hosi Mertutu inklui Ensinu Báziku Filiál Holorema no Ensinu Báziku Sentrál Mertutu.
“Anin maka’as iha loron 01 to’o 02 janeiru 2023 konsege sobu eskola tolu iha Ermera,” Diretór Servisu Edukasaun Munisípiu Ermera, Marco Soares Martins, informa ba Agência Tatoli, via telefónika, kinta ne’e.
Nia dehan, edifísiu Eskola Edukasaun Pré-Eskolár Holorema no Ensinu Báziku Sentrál Mertutu hetan estraga hosi udan no anin iha loron 01 janeiru 2023 no Ensinu Báziku Filiál Holorema iha loron 02 janeiru 2023.
“Parte munisipál hato’o ona pedidu inklui dadus eskola ba Diresaun Nasionál Asaun Sosiál Eskolár atu hetan apoiu materiál emerjénsia hodi bele hahú hikas eskola tolu ne’e,” nia akresenta.
Notísia relevante: Anin sobu eskola tolu iha Manufahi
Udan no anin sobu Edukasaun Pré-Eskolár ho medida metru 7×20, kompostu hosi sala aula tolu, ida sala profesór no sala aula rua ba estudante, enkuantu edifísiu Ensinu Báziku Sentrál no Filiál ninia ho medida metru 9×30, iha sala aula neen inklui sala ba profesór, biblioteka inklui sala aula ba estudante.
“Ho nune’e, grau gravidade ba eskola tolu ne’e bela dehan maka’as iha parte kakuluk tanba kalen barak mak estraga, balun anin lori lakon inklui ai travesaun hosi parte kakuluk barak mak tohar,” nia tenik.
Tanba ne’e, Diretór ne’e sujere atu ministériu bele halo lalais intervensaun hodi bele rezolve molok prosesu ensinu aprendizajen kontinua filafali iha loron 09 janeiru 2023, nune’e estudante 400 resin iha eskola tolu ne’e bele partisipa aula ho di’ak.
Jornalista : Tomé Amado
Editora : Julia Chatarina
