VIQUEQUE, 05 janeiru 2023 (TATOLI)—Autoridade Protesaun Sivil Viqueque rejista dadus provizóriu, iha uma 72 hetan estragu durante akontese anin no udan ho intensidade boot, hahú loron 28 dezembru 2022 to’o agora.
“Dezastre naturál ne’e akontese iha postu administrativu haat iha Viqueque hanesan Uatucarbau uma estraga 35, Ossu uma 23, Viqueque Vila uma haat no Uatulari uma 10. Dadus hosi postu haat ne’e ami rekolla iha loron tersa (03/01) no kuarta (04/01). Anin sobu komunidade nia uma, ami rejista hotu ona, maibé ami seidauk simu informasaun anin sobu uma iha postu Lacluta,” Komandante Operasaun Autoridade Protesaun Sivil, Inspetór Polísia, Matias da Silva, hateten ba jornalista sira, iha ninia knaar fatin, Beloi, Viqueque Vila, kinta ne’e.
Notísia relevante: Anin sobu komunidade nia uma no uma-lisan iha Viqueque
Aleinde ne’e, Protesaun Sivil seidauk fó apoiu emerjénsia ba vítima dezastre naturál tanba vítima sira hela liu iha área rurál no transporte labele asesu estrada hodi tula sasán emerjénsia hodi halo distribuisaun.
“Tanba ne’e, ami sei halo planu no sasán emerjénsia nian daudaun ne’e iha ona armazen Protesaun Sivil munisípiu Viqueque nia fatin. Prosesu distribuisaun ami sei la fahe direta iha vítima sira-nia fatin, maibé ami sei halo distribuisaun iha postu administrativu haat maka vítima sira mai simu. Enkuantu pakote emerjénsia balun ami rai ona iha postu Uatucarbau, maibe ami horikalan simu informasaun katak iha Uatucarbau akontese tan dezastre naturál, ne’ebé ami sei ba dala-ida tan atu rekolla no distribui ba vítima sira”, nia akresenta.
Pakote apoiu emerjénsia ne’ebé Protesaun Sivil sei fó ba vítima sira kompostu hosi foos, mina, supermie, dose, terpal no sasán nesesidade bázika ne’ebé vítima sira presiza liu.
Iha biban ne’e, Komandante Operasaun Autoridade Protesaun Sivil, husu abitante munisípiu Viqueqeu, tanba daudaun ne’e anin ho intensidade boot maka tenke asegura uma ho di’ak atu anin labele sobu no abitante sira tenke buka meiu hodi taka ai ruma ba uma leten nune’e anin labele estraga.
“Agora sei iha anin no udan, ita-nia kondisaun maka hanesan ne’e, sira mós tenke asegura família uma laran no buka fatin seguru ruma hodi hein rekupera sira-nia uma ne’ebé hetan estragu ona,” nia apela.
Jornalista : Vitorino Lopes da Costa
Editora : Julia Chatarina
