VIQUEQUE, 03 janeiru 2023 (TATOLI)—Anin-boot iha loron hira ikus konsege sobu abitante sira-nia uma no uma-lisan iha munisípiu Viqueque.
“Ha’u simu informasaun hosi komunidade kona-ba akontese anin-boot estraga abitante nia uma ida iha aldeia Lakona no uma-lisan ida. Anin huu hodi halo ai-riin haat tohar hotu iha aldeia Daralari,” Xefe suku Afaloikai, Agustinho Pinto, hateten ba Agência Tatoli, via telefónika, tersa ne’e.
Notísia relevante: Anin sobu uma-sia iha Lialailesu Caisido
Autoridade lokál ne’e haktuir, anin sobu abitante nia uma maizumenus tuku 17:35 lorokraik no uma-lisan tuku 18:00 lorokraik, iha loron 29 dezembru, ne’ebé hafoin akontesimentu ne’e halo edifísiu sira hetan estragu totál, enkuantu sasán uma-lisan iha Daralari konsege muda no asegura iha komunidade nia uma.
“Nu’udar autoridade lokál, hakarak husu ba parte relevante sira hodi ajuda netik vítima dezastre naturál. Daudaun ne’e anin kontinua boot,” nia akresenta.
Iha fatin ketak, Administradór postu Ossu, Sebastião Fereira Pires, hateten, anin-boot estraga hotu rezidénsia.
“Rezidénsia administradór ne’ebé ha’u hela ba, agora anin boot sobu halo labele hela iha laran. Enkuantu, ha’u seidauk simu informasaun hosi Xefe suku sira kona-ba abitante nia uma, maibé ha’u sei bolu xefe suku sira hodi atualiza informasaun ba ha’u kona-ba anin-boot ne’ebé akontese ne’e,” nia tenik.
Jornalista : Vitorino Lopes da Costa
Editora : Julia Chatarina
