Anin boot sobu eskola haat iha Covalima
COVALIMA, 06 janeiru 2023 (TATOLI)–Diretór Servisu Munisipal Edukasaun Covalima, Rui Amarál Suri Seran, informa udan no anin boot ne’ebé akontese iha dezembru 2022 nia laran ne’e hamosu dezastre natural ne’ebé rezulta eskola haat (4) iha Covalima naksobu no estraga totál.
“Bazea informasaun ne’ebé ha’u simu katak Eskola Bazika Central (EBC) Bulu ne’e anin sobu nia kakuluk hotu, EBF Zulo-Tas anin sobu zinku balun, EBF Dato-Moris no EBF Aitos Fohorem anin anin sobu zinku balun. Informasaun ne’e mak Servisu Edukasaun Covalima simu hosi dirijente eskola haat (4) ne’e katak ninia kondisaun estraga total,” Rui Amarál Suri Seran hateten ba jornalista sira iha resintu Aadministrasaun Munisípiu Covalima (AMC), Sukaer Laran, sesta ne’e.
Ho problemma ida-ne’e, Aervisu Edukasaun Covalima semana oin sei submete relatóriu ba Ministériu Edukasaun Juventude no Desportu (MEJD) hodi haree kondisaun no bele foti desizaun atu bele rezolve lalais.
Ho nune’e, nia dehan, MEJD tenke foti lalais desizaun hosi halo intervensaun ho urjénsia, se lae estudante sira atu eskola iha ne’ebé, tanba agora prepara tama ba iha prosesu aprendizajen periódu 2023 nian.
Alende anin boot estraga eskola, bazea ba dadus provizóriu ne’ebé administradór munisípiu Covalima, Francisco de Andrade, fó sai katak impaktu hosi dezastre naturál anin sobu mós komunidade sira-nia uma hamutuk 10-resin.
Hafoin ne’e, autoridade Covalima mós orienta kedas ba Autoridade Protesaun Sivil (APC-sigla portugés) ho nia ekipa hodi halo identifikasaun ba komunidade nia uma, iha postu administrativu sira-ne’ebé komunidade nia uma hetan estragus.
Jornalista : Celestina Teles
Editór : Cancio Ximenes
