COVALIMA, 06 janeiru 2023 (TATOLI)–Diretór Servisu Edukasaun Munisípiu Covalima, Rui Amarál Suri Seran, fó ona orientasaun ba diretór eskola sira labele halibur osan hosi inan-aman atu suku uniforme ba estudante sira iha li’ur.
“Ha’u seidauk asesu despaixu hosi Ministériu Edukasaun Juventude no Desportu (MEJD). Maibé liuhosi enkontru nivél eskolár, fó ona orientasaun ba eskola hotu sei la autoriza inan-aman halibur osan hodi sosa uniforme ba estudante. Tanba sei hein despaixu hosi MEJD hodi deside uniforme ba estudante sira territóriu nasionál,” Rui Amarál Suri Seran hateten ba jornalista sira, iha resintu AMCSukaer Laran, sesta ne’e.
Razaun Ministériu Edukasaun la autoriza eskola halibur osan atu sosa uniforme ba estudante sira, tanba Governu liuhosi MEJD iha ona polítika atu deside uniforme ba estudante hahú hosi eskola pre-eskolár, Ensinu Sekundáriu Jerál no Ensinu Tékniku Vokasionál sira iha munisípiu Covalima.
“Tuir despaixu MEJD la autoriza estudante-sira atu sosa uniforme iha li’ur, ho nune’e MEJD mós orienta ona ami. Ami mós fó ona orientasaun ba diretór eskola sira labele kobra osan hosi inan-aman atu sosa uniforme, ho nune’e MEJD sei hasai despaixu hodi sosa uniforme ba estudante sira,” nia dehan.
Bazea ba dadus hosi Servisu Munisipál Edukasaun Covalima, totál eskola hamutuk 211 no eskola pré-eskolár hamutuk 18 ne’ebé eskola pre-eskolár públiku ualu (8) no privada 10.
Jornalista : Celestina Teles
Editór : Cancio Ximenes
