Horta: Estadu presiza foti medida radikál ba kazu oho malu
DILI, 06 janeiru 2022 (TATOLI)—Prezidente Repúblika (PR), José Ramos Horta, hateten kazu oho malu kontinua mosu iha rai-laran ne’e Estadu presiza foti medida radikál hodi hapara asaun hosi elementu ka grupu sira-nian.
Xefe Estadu hato’o kestaun ne’e, relasiona ho joven ida ho naran Isac Sinarai da Costa (20) hetan oho hosi ema deskoñesidu iha área Elemloi Delta III, suku Comoro, postu administrativu Dom Aleixo, munisípiu Dili, sesta (06/01) madrugada.
“Se presiza medida radikál ba elementu no grupu sira-ne’e tenke hetan resposta firme hosi Estadu no Estadu labele mosu fali hanesan fraku,” PR Horta hateten ba jornalista sira iha aeroportu internasionál Nicolau Lobato, Comoro, hafoin fila hosi Brazíl, sesta ne’e.
Nune’e, nia dehan, presiza medida ida hosi Estadu hodi prevene akontesimentu sira-ne’e iha futuru labele akontese beibeik.
Ramos Horta hateten, nia-parte iha planu atu konvoka enkontru ne’ebé markadu ona ho Konsellu Superiór Defeza no Seguransa iha loron hira tuir mai.
Iha enkontru ne’e, tuir nia, dahuluk sei rona informasaun hosi instituisaun seguransa sira iha ne’e, saida tan mak bele halo hodi hapara ho grupu sira-ne’e.
Jornalista : Nelson de Sousa
Editór : Cancio Ximenes
