DILI, 06 janeiru 2023 (TATOLI) – Komandu Polísia Nasionál Timor Leste (PNTL) asegura ona ema nain-lima tanba kazu ema deskoñesidu oho Isac Sinarai da Costa iha Elemloi.
“Maizmenus nain-lima maka ita asegura ona iha Komandu PNTL Munisípiu Dili no hosi matebian nian aman mós ita foti hotu ninian deklasaun iha ne’e”, Komandante PNTL Munisípiu Dili, Superientidente Xefe Natercia Martins, ba jornalista sira iha Sentru Formasaun Polísia, Comoro, sesta ne’e.
Nia dehan ema hirak ne’e PNTL asegura ne’e nudar vítima Isac Sinarai da Costa nia kolega ne’ebé hemu tua hamutuk.
“Sim iha prosesu inisiál konserteza joven sira ne’e sai hanesan alvu ka fonte ba informasaun ba polísia tanba ne’e komandu fó ona orientasaun ba Komandu PNTL Eskuadra no mós ekipa invetigadór atu asegura joven sira ne’ebé maka hemu tua hamutuk ho matebian, hodi nune’e ita bele rekolle informasaun husi sira”, revela.
Natercia husu ba ema hotu atu apoia serbisu PNTL, nune’e polísia bele hetan autór ne’ebé oho ona matebian Isac Sinarai da Costa.
“Ha’u nia hanoin ita bele hetan suspeitu ne’e maibé ha’u la bele promete tanba presiza prosesu, maibé ita nia espransa bo’ot ita bele hetan lalais. Espera katak ema hotuhotu nia espransa no parte hotuhotu ne’ebé hakarak servisu hamutuk ho polísia, ba oin ita sei hetan ema ne´ebé mak komete krime omesídiu ida ne’e”, adianta.
Komandante akresenta ba kazu ida ne’e rasik polísia husu ona autorizasaun hosi Ministériu Públiku hodi rekolla CCTV iha fatin akontesimentu.
Nia husu ba Komandu PNTL Dili entrrega ona mate isin ba parte foreinsik hodi submete ba prosesu autópsia ba mate isin Isac Sinarai da Costa iha Hospitál Nasionál Guido Valadares.
Notísia relevante :Ema deskoñesidu oho joven ida iha Elemloi
Jornalista: Natalino Costa
Editór : Zezito Silva
